S W A S A N A

Trawang-trawang ngalela
Ing saksela-selaning godhong selamba
Sumamburat jingga maya-maya
Laraping hyang sandyakala
Nalika sonya anelahi mega

Candhik kala
Nyendhal jaja
Kinukut tan sisa
Ngegana
Ngubal sangkrahing duhkita

Kotabumi, 27-12-2011
DS

S U M Y U R

Jumurungku
Katungka dening kedaling kelu
Nyangking palastraning wektu
Njejeri lelagon rangu-rangu
Mingkuri laku

Lemekan gelu
Mangu-mangu
Mendhem raga dadi awu
Tan kuwawa nguwalake reretu
Tresnaku

Kotabumi, 17-12-2011
DS

SABAYA PATI

Tetembangan kinanthi
Angger-angger ilir ngumandhang nyengsemke ati
Ngidungake donga asmara
Ngenam kaedahaning wirama tresna
Ngobar antepe tekad giliging niyat
Ndayani keketing astamu ngregem atiku
Paseksen mijiling prasasti
Janji sabaya pati
Bebrayan

Kotabumi, 13-12-2011
DS

OHH, KATRESNANKU

Nyawang kumrelipe lintang wong bagus
Kijenan ing plataran
Kaya-kaya
Kagambar sliramu satuhu
Ngelaga ing tawang biru

Ati kiyi kapang
Nyidham mecaki dawane wengi
Lelumban ing wirama lan solah bawa edi
Endahe katresnan iki
Bali kaya wingi uni

Geter panther nggucengi bundhelane ati sing kejuwing
Ing pangirane rembulan mesem kepencut melu ngliling.

Kotabumi, 05 Agustus 2013
DS

T R E S N A

Dumadakan aku kepengin dadi lintang ing tawang
Ngegana
Ndedel akasa
Rerangkulan klayan rembulan
Nedya lelangen marang sunar kencana ing dhadhamu
Sing salawase iki
Ngrenggani wewengkon atiku
Lan ngujiwatake jejangka
Marang sagegem ukara
Tresna

Kotabumi, 06-12-2011
DS

DALAN IKI

Bali dakpecaki dalan iki
Mbokmenawa isih bisa daksawang rembulan
Lan sapatemon klawan sliramu
Nyungging sesanti ing langensari
Nyulami ati

Ing kene nate dakukir prasasti
Ing kene nate kaucap janji
Ing kene uga bali dakpecaki
Dalan kang medhot ilining kali
Katresnan

Kotabumi, 05-12-2011
DS

M A N G R O

Bali kekidungan iku krungu ngumandhang
Pijer nglelaga kanthi tembung-tembung ngayawara
Lan sumilire angin kumlawe ngaras pange rawe
Ngelingake endahe esemmu sing katutan tlutuhe senthe

Wus makaping aku nyoba nduwa
Lan nggetuni playune tresna sing kasamudana
Ya gene wewayangmu sansaya nglelewa
Nyemoni atiku kang njarem nelangsa

Apa isih paedah daksanggem kidung
Kanggo ngandheg ati kang liwung

Kotabumi, Madya ratri
DS

T R E N Y U H

Dumadakan trenyuh ngelun pangrasaku
Nalika mbaka siji
Kawiyak kaca lembar lelakon klawu
Sajroning roncen pengangen
Lan ati sing kangen

Dak tampa kanthi perihing rasa
Dak pupus kobaring tresna
kabegjanmu ginawa ing babad katresnanku
Kasimpen endah ing taman pandulu

Mangu-mangu isih ngrerepa manising esemu
Sandayan ta saikine sliramu, wus ana sing ndhaku

Kotabumi, 19-11-2011
DS

EDINING ASMARA

Wengine truntum arum
Ngedum rerumpakan kaendahaning wirama tresna
Tumuli tinemu laladan rinengga rembulan
Nalika tanganku kok kanthi
Nyabrang edining megare kembang
Nuju papan sing dadi gegadhangan

Sauntara, wengi sansaya tumlawung ing palung samun
Ndayani sanggem lan tetembangan roncen pemarem

Kotabumi, 12-11-2011
DS

LELAKON

kaca kaca purwa
Mbaka siji kewela
Ing pangename rasa
Nembangake kererentan
Saka gempilaning lelakon
Kang sangsaya tundha
Ndhepani lingsir
Lan panalangsa

Mendah rempu pangrasaku
Kalamun wus prapta
Kinanthi kidung purnaning ratri

Kotabumi, 03-11-2011
DS

PANANDHANG

timbrenging sesawangan
gawang-gawang ndayani ati kang sepa
rasa kasiya
panjeriting jiwa nelangsa
wus kadhung tumama
ing telenging kaca rasa
kanthi tetangis ngelak usada

tresna iki tresnane sapa....?
kangen iki kangene sapa...?
geneya kudu linambaran dhusta

Kotabumi, 26-10-2011
DS

GURIT PANGLIPUR

Rerakit sastra ginurit
Ing dluwang-dluwang putih dakripta
Kinarya tamba duhkitaning nala
Anglaras lelaraning jiwa
Amung nuruti adrenging rasa
Kang kumudu - kudu
Kang kalut kapilut pamiluting tembung memalatsih
Jer nyatane amung nggembol lelamisan kewala
Kaca-kaca mbaka siji, saya cetha mbebeda ati

Kotabumi, 24-10-2011
DS

JANJI PRASASTI

isih ana rembulan panglong
kang kasdu nyoloki laku wengi kekes samun
lan angina lirih tumiyup ing getering kuncup-kuncup mlathi
impenku lan impenmu nyabrang ing sepine taman sriwedari
nlusur ing ngendi nate kaukir janji prasasti

apa isih ana salembar karila-legawan
negesake wujude kaendahan
kang dadi wungkusing prasetyaning                                      
atiku lan atimu
 

Kotabumi, 20-10-2011
DS

ASMARANDANA LENA

pangarasing kapang
gawang-gawang tumiyung ing ngawang-awang
nelungake pang-pang panandhang
peteng nggameng atiku gothang   
jer nyatane
jangkah wus kabacut adoh simpangan
lumaku milih dalan sowong-sowangan
kejer kekitrang kelangan katresnan

ya gene asmaradana lena....                                                             Sauntara ing rasa, isih ngrerepa natah asmamu kusuma                                                                                                                                                                
Kotabumi, 16-10-2011
DS

WULANJAR TINEMU SEPA

Daksuwek wingiting wengi
Dakluru suwunge ati
Sanadyan ginubed tintrim rinasa ngrujit
kepati sepi kinaweden kori-korining ngaurip
Nyamudana wingkis sakehing kekarepan
Nutup kudhuping kekembangan

Tembang karerentan
Mbeber panalangsa
Karamut kanthi tumetese waspa cuwa
Tangising wulanjar kang nandhang duhkita

Kotabumi, 14-10-2011
DS

SAMUDANA

Anetes idu manis
Angemu wisa hawa
Lumrang angambar janji
Nilep netra binuka
Tan wijang soroting wulan
Yektining uni keri
Amung njojoh ati

Kotabumi, 10-10-2011
DS

LELAGON KAPANG

Gegambangan lelagon kapang
Ngujiwat nelungake pang eseme
Aggandha arum mlati rinonce
Ndayani lathi angucap asmane
Kang rina wengi dadi impene

Sauntara sumiliring angin saya kekes pangeluse

Kotabumi, 07-10-2011
DS

N E N D R A

Pangename rasa
Tuwuh mbabar cepaka mulya
Ndedel akasa
Ninggal ati njarem nelangsa
Mara
Sanja
Amburu lena
Anungka yitna
Nendra


Kotabumi, 04-10-2011
DS

KEMBANGE PIKIR

Kembange pikir
Lah tanem tuwuh sakalir
Godhongmu ngrambah kumitir
Mak sar atiku kuwatir
Lir uwuh ing kali kintir

Kotabumi, 03-10-2011
DS

PRASETYANING ATI

angler nggleser
maruta sing tumiyung
ngelus pipi
ngrambati sela-selaning ati
nambah resep kahanan ing pandulu
gending asmaradana
ngrangin
ngelus ati tansah nggujengi
prasetyaning ati

tresnamu
anjalari bungah
tansah angreridu
tansah nggegiri godha
datan kandheg dening apa-apa

Kotabumi, Lingsir wengi
DS

NASIB KEMBANG

mawar abang
ngrembaka endah ing tlatah cengkar
arum gandamu mangambar-ambar
mernahke ati reseping panyawang
dumadakan alum .....
ketrajang kumbang pangisep madu
sirna putik sarining mahkota

kembang sore gogrog tumiba bantala
tetela tan ana janma nglegewa
ilang musna aruming ganda
ngabar kababar samarga-marga

Kotabumi, Lingsir sore
DS

KINANTHI

kinanthi gemulunging samodra
dumadakan tuwuh ana dhada
ngluru ilining banjir sangka rasa
kang pijer nelangsa kapisah purba
dhuh asmaradana
ya gene mung sanepa
ya gene mung samudana

Sauntara ing telenging dhadha, isih daksimpen banyu tawa

Kotabumi, 27-09-2011
DS

DLUWANG JINGGA

geneya durung prapta
geneya isih semaya
apa ora trewaca ing kana
gurit katresnan ing dluwang jingga
sing saben sore dak kirim bareng sumilire samirana
nalika sonya anelahi mega 

Kotabumi, 24-09-2011
DS

KIDUNG WENGI

Langgam kinanthi mung kirim janji
Tumiyupe angin wengi
Asmaradana isih semaya
Sanadyan wus ngegla-ngegla
Tembang pocung layung-layung
Geneya saya temlawung

Ndhodog korine wengi, nyawang ati nggurit sepi

Kotabumi, Lingsir wengi
DS

M A R A S

Ati maras
Kapulas pendheman lawas
Nyat katon nyat ilang tanpa wekas
Ngudhal-udhal crita lawas
Kang suwe wus ora ginagas

Sauntara sliramu, sliraku wus ana sing ndaku

Kotabumi, 21-09-2011
DS

CRITA LAWAS

pangarasing wengi
mbabar gegaraning ati
nggeget karep nutuh kori
impen kawuri

roning katresnan
kabur kanginan gogrok sadawaning dalan
ndayani tresna lan pepasihan
mungkasi crita babad katresnan

mecaki dalan latu kebak tatu
mbebirune ati tresna klawu

Kotabumi, 17-09-2011
DS

M A N G R O

Kang..
apa tresnamu isih gumantung liwung
apa kabuncang ing jembare tawang
apa pancen isih kudu ngenteni
tetese bun ing bedhug ndhrandhang
manglung kanti pangarep-arep tembung katresnan
geneya swaramu mung mandheg ing gurung

dakanggit talining tresna
geneya ana rasa tidha-tidha
gawang-gawang guyumu tansah mbebeda
nyemoni atiku kang njarem nelangsa

Kotabumi, 14-09-2011
DS

 

 

K A N G E N

Wengi iki,,,,
Aku kangen angeting asihmu
Aku kangen elusing pangayomanmu
Aku kangen edhuming swara pangemanmu

Ambruk ing pangarasing astamu
Ing gebyaring lintang ayuta

Kotabumi, 13-09-2011
DS

PENGANGEN

Nalika daksawang
Kumrelipe lintang kang ambyor ing tawang
Kaya-kaya katon esemu ing kana
Nyawatake tengara asmara
Nyipta baweraning kaendahan
Ngekep rasa kapang kagubel ulenganing wengi

Njangkah tapaking ati
Kang negar-negar mbradhat nyasak sangga runggi
Nguntabake janji
Dadi kasunyatan jati

Kotabumi, 09-09-2011
DS

PRASETYANING ATI

angler nggleser
maruta sing tumiyung
ngrambati pang lan
wit sing tinanem ijo godhonge
nambahi resep kahanan ing pandulu
gending asmaradana
ngrangin
ngelus ati tansah nggujengi
prasetyaning ati

Kotabumi, Madya ratri
DS

DINA PUNGKASAN

Semiliring angin
Nyampluk rambut kang kumlebet ing pipi
Binarung kembeng kaca-kaca
Rinasa abot ngeculke tangan
Kang keket gegondhelan

Lamat nanging cetha keprungu ing talingan
Swaramu ing dina pungkasan
"Entenana dhuh ati"
"Aku bakal enggal bali"

Angliwati dalan iki
Dumadakan aku kelingan sliramu
Kocap wus setahun lawase
Aku koq tinggalake

Kotabumi, lingsir sore
DS

K A P A N G

lelewane langit timbreng
semu sengsem samudana samun
lelamisane mega-mega peteng
ngrucat gumbira
mucetake pengangen
gumandhul tan bakuh talining ati

mungguhing praptamu dhuh kakang
dak pepuji dak pupus rerepan ati
watara suwe nggonku ngenteni
baya kapan silramu bali

Kotabumi, madya ratri
DS

I B U

jerite sora pating jlerit
nalika jabang nyawa
arep lair nang alam donya

marmati oncat saka dhadha
banyu kawah paring pratanda
getih kumucur tanpa kaukur

nadyan lara kaya ngapa
paring nyawa saka jroning garba
mijil ponang jabang nyawa
linambar tetesing waspa
lila legawa

dhuh ibu...
katresnanmu lir jembaring segara
welasmu ora bisa winales kanthi apa

Kotabumi, Madya ratri
DS

L U N G S E

Ngajab sumilire angin sore
Ngronce impen ngawe-awe
Sanadyan ta crita lawas wus saya lungse
Perih tan ana pedhote

Kotabumi, Lingsir sore
DS

BEBRAYAN

Gilar - gilar soroting netra
Linambaran bebingah sajroning nala
Urip pindha salawase suwe
Tanpa ana akhire
Nyidam mecaki donya kaya serep nyawa

Binarung swara njiwit gendhing Jawa
Kongang nguntal talining rasa
Sumusup ing sasela-selaning jiwa
Pindha ketetesan banyu embun ing wayah esuk
Tentrem mahanani kahanan jenak

Bebrayan kanthi katresnan
Sliramu lan sliraku

Kotabumi, Iedul fitri 1432 H
DS

LINGSIR WENGI

Lingsir wengi binarung sepi
Eling nalika kaaras pipi
Lan kok geget lathi
Kaya - kaya isih wingi uni

Miyak ati mecaki wengi
Ndlidir pindha laku kawuri
Kang linambar arum gandaning melati
Kepranan wawayang kang edipeni

Dhuh Ati .....
Jagadmu ana ngendi
kapan rasa kapangku iki arep diusadhani

Kotabumi,,,Lingsir sore
DS

K A P A N G

Lelewane langit timbreng
Semu sengsem samudana samun
Lelamisane mega-mega peteng
Ngrucat gumbira
Mucetake pengangen
Nglamurake pangira
Gumandhul tan bakuh talining ati

Mungguhing praptamu dhuh kakang
Dakpepuji dakpupus rerepan ati
Watara suwe nggonku ngenteni
Baya kapan silramu bali

Kotabumi, madya ratri
DS

P E D H U T

apa isih ana rembulan panglong
awit langite jembar kari sesigar
sumilak
pedhot dening kandele pedhut
ireng langes tanpa teges
kaya dene atiku
kelangan wewayanganmu

Kotabumi, Madya ratri
DS

BOJO WAYUHAN

gumpilaning duhkita iki
nelesi wingit sangaring marga katresnanku
tinandur tuwuh ngambra-ambra
abote rasa kang tak sandhang
dadi bojo wayuhan

sirna sekabehing
weninge warih kaswargan
elusing pangayoman
edhuming swara pangeman

ngurut tritising sepi
nanting ati marang hurubing geni
Kobare pati

Kotabumi, 17-08-2011
DS

N G E G L A

ratri
nelungake rasa emu
njerem biru erem
nyendhal jaja
njejag raga
nngrerintih perih
anelungake tlutuh bening
anelesi pipi
sing ora isa kumbi
dilewati sepur mili

prastawa kawuri
ansah ngegodha
sanadyan wus tetaunan
katinggalake

Kotabumi, 05 agustus 2011
DS

WENGI SINTRU

Wengi ireng nggenthileng
Mulasara kangen iki
Kang ngemu sagedabyah ubaling pepenginan
Nyawiji marang sliramu
Senadyan ta pedhut
Anggubel atiku

Rarasing riris dhadha kumesar
Gumandhul tan bakuh talining ati
Mung hoyag hoyig katut abure angin
Paninthinge mung ambane kuping
Lan winates kedheping netra
Pangimpene kupu miber endah wurung

Kotabumi, 24-08-2011
DS

P U P U S

Grumbul pandhan
Luruh semu
Aweh paseksen selaking kasunyatan
Tumungkul nunjem-nunjem dom wengi
Natasi tresna kang mbebiru ati
Antaraning aku lan sliramu

Sanadyan tejaning wulan, isih manther ing sela-selaning gegodhongan

Kotabumi, Madya ratri
DS