ARAK-ARAKAN GEGURITAN NAWANG WULAN

Senin, 27 Agustus 2012

ELEGI WENGI

Kinanthi kidung lir gumanti
Ngaru-ara sauruting rumambate angin
Ngaras reroncening ati
Nitih nam-naming batin
Kang ginubel ing
Jembaring pangangen-angen

Nyuntak impen-impen
Nganam rasa lawan ganthilaning sukma
Dimen biruning langit atiku
Bisa dakgambari manising esemu
Bareng kumrosaking swara wit-witan
Keterak angin lelaku

Kotabumi, 26-08-2012
DS

Sabtu, 04 Agustus 2012

P R A S A S T I

Angin angidid alon
Sumrambah gandaning sekar
Mbarengi rembulan kang lagi ndadari
Kairing kidung sonyaruri
Njanjeni swasana endah anglam-lami

Njawat astamu wong ayu

Lungguh sumandhing wadag

Lingga sumandhing yoni
Bebarengan nyangkrik nduwuring prasasti
Mawa asmaradana ing madya ratri

Apa kowe isih kelingan, Yayi


Kotabumi, 04-08-2012

DS