ARAK-ARAKAN GEGURITAN NAWANG WULAN

Kamis, 27 September 2012

PANGANGEN

Sumilire angin silir ndlidir
Rinasa edhum lelumban pikir
Nrabas dawane wengi
Nglari ilining wektu
Njangkah angen nguyak impene ati

Maspadakake lintang rembulan, Yayi
Runtang-runtung njangkah mecaki tawang
Rerangkulan, tetembangan
Andum tresna mawa asmaradana
Nganti purnaning mangsa

Ampuranen aku, Yayi
Mung bisa ngronce manising esemu
Mung bisa ngentha kasulistyanmu
Awit aku mung kepengin
Sliramu tansah ana ing
kedhep lan ereme tlapukaning netraku

Kotabumi, 26-09-2012
DS

Sabtu, 15 September 2012

P U P U S

Dak sampirake pangarep-arep kebak wewayangmu
Ngupiya nylamur pangeling-eling ngegla ing dhadha
Rasa sepi lan kalunta
Kang wis ora geduga rinengga lara

Mabura
Sakombule langit
Slulupa
Sadedeg telenging samodra
Lepasa
Sakjembare ara-ara
Sagungliwunge wanawasa
Dimen ilang sakehing duhkita.

Kotabumi, 15 september 2012
DS

Kamis, 06 September 2012

LINTANG SIWI

Alum-alum tumiyung
Malengkung
Kucem surem tanpa surat mangguwung

Lintang siwi
Ngiwi-iwi
Kumrelip ngrengga kangene ati

Besuk kapan kalakone
Baya kapan dumadine
Nyandhing slirane, Yayi.
Kotabumi, 06-09-2012
DS

Senin, 03 September 2012

CIDRA-MU

Nglambrang nglangut
Lir wulan ketawang pedhut
Ngajab kalodhangan tinebak luput
Cacahing wilang kinukut
Tanpa pagut

Katresnanmu

Yagene mung kokampirake ing panglamunku
Yagene mung dadi impen-impen endahku
Wungkul ing alam maya paite katresnanku
Memerih tatu tlapukaning netraku

Tirta lelayu

Worsuh nyemoni pandulu
Sakwuse cidramu
Nilasake tatu
Nggarit atiku

Kotabumi, madya ratri
DS