CITRAMU

liring citramu kang nutuh langit
apa sih dakrangkul asmara suci
nimas kaya angin kang nyempyok
gegodhongan uga bun kang nyawur
kembang
nalika tintrim ambanyu mili, lan sliramu
ora kandheg dak wernani

Kotabumi, Madya ratri
TS

KAPANG MBRANANG

ya gene tumenga, Wulan
apa kang koksawang
ngetung lintang
mapag rembulan
apa kowe kelangan konang???

aja takon marang mangsa
aja mung maca sasmita
takona marang lungite geguritan
mingise glathi wus tumumpang
salumahing kertas suksma nadhi abang
lan kumucure mangsi asih wis nelesi
: kapang mbranang

Kotabumi, kalane lingsir
TS

W E N G I

wengi
ing pangkonmu apa ana angin salah mangsa
sing nggubet waru Ian trembesi
patang taun lumaku
lara lapa kekalangan ngudang rembulan
apa ora ngerti??
apa wus kokcathet ukara-ukara pingget
apa wus kok bengket
apa.....apa.....apa???
ah...
bokmenawa kowe bisa ngerti
ing kene aku
isih ngrengkuh dina-dina mburi.

Kotabumi, 06 Desember 2017
TS

ARUM DALU ING DHUWUR SLAMBU

arum dalu, arum dalu

liring esem abang gincu

arume wengi, arum wengi

ya gene sih sore wus ngganda wangi?

edhum netramu

awor esem larang guyu

nabuh titir geter jantungku

dhuh nimas

aku kepayang ing lirih swara bebisikmu

"kakang wengi iki lintang iku dhuwekmu"

dak arasi lunyune pupu

dakpacaki legok genenge sangupanmu

ireng pedhut kang ngemuli gunung-gunungmu

manggang rasa lanang Ian greged kelu

ayo nimas, lelangen ing segara madu

langit samun jinem

mripatmu merem

slambu gonjing jagad kelap-kelap lerem

kringet mampet amem amem

o, mlatiku- o, mlathiku

mekrokmu kok ora lencu

ajeg putih tanpa tetesing getih?

Kotabumi, 30 September 2017

DS

LUNGITING ASMARA

dak lampu-lampu rerambatane mega
nadyan ngliga gambarku ing kana
ewa semana wus ana paraga sujaga liya
apa kesaput nggembulenging cuwa?

wus dakjangka tindakmu mring tlapukaning mangsa
jenengmu lena wujudmu rasa
ewasemana trisnaku-trisnamu reca
apa bengkah ing lempitaning sanggan kita ?

daklela-lela atining sutra
benang abang kang rantas saka panjangka
labuh-lebet roncen kang muspra
Kakang, apa aku kuwawa?

ing perang kreteg dalan sabrangan
ing lumah kurebe rasa asih lan tembang pepisahan
nglangut lagune, perih atine
lungiting asmara, lungiting asmara

Kotabumi, 09 September 2017
DS

KLUWUNG

Kluwung
Cahya awoh
Kartika sumebyar
Ngekeb kesumane wengi
Aku mung bisa ngregrem
Dhadha lan ambane ati
Kanggo ngabangake kasetyan lan
katresnan jati
Marang slira-MU

Kotabumi, Purnama sidhi #TS

ARUM DALU

Arum dalu
Mumbul ngawiyat muncrit kangenku
Liring sutramu

Runtung kemitir
Lamur abyore lintang
Krelipe candu

Kitir angenku
Midid angaras abang mamah telese gincu
Nyilake pupu

Godhong, kayu, watu ngiring lakuning geni tumrap abange ili getihmu-getihku
Rasa kasdu.

Kotabumi, 4 juni 2017
Lanangmu.

AKU KANG ANA SANGAREP WEWAYANGMU

melip ndhedher milang wektu
candhik lingsir amarikelu
sakmangsa liwat bali mlayu
perih tan uwal nguntab esemu

cicir gurit-gurit ayu
lembar lawas angreridhu
getir anyawang rembulan wayu
wengi lumingsir samun dinulu.

Kotabumi, Madya ratri
DS

MARANG WEKTU

isih katon garising kledhangmu
antaraning ririse grimis anyapu lebu
antaraning iline napas mingseg amburu 
sore iku

dadia watu
dadia banyu
dadia klawu
utawa balia dadi lebu 
cah ayu, ing kene sliramu tansah dak antu.

Kotabumi, pungkasane taun 2016

TS

DAK GURIT IGAMU

dak gurit igamu
nalika wengi kasingid sunare rembulan
lan tintrim wus kebacut nyulam kelu
nunjem-nunjem jerone kalbu

banjur apa meneh sing bisa dak pasrahake
yen langit wus laburan peteng
yen biru wus malih ireng
kelire rasa sansaya muspra

dak gurit igamu
antaraning rangkulane lengen lan pupu
kareben kringet kita bareng tumetes
nelesi lemah nela
keli mili bebarengan iline napas
ngligane gincu.

Kotabumi, 13 Desember 2016
DS

ATASE KANGEN

dakaras lena
njlarit kluwunge mega
ing langit kana

semburat abang
candhik wanci sore
ninggal papanne

esem semana
sung kumanthil netra
kawure rasa

nebet tilase
nyithak angen sumendhe
ing latar kene

lawas gumlewang
getir tansah angembang
sora anggadhang

kebak pengarep
nggetih adrenging kareb
gemulak tan bisa meneb

balang liringe
isih katon-katonen
dhuh nimas, atase kangen

Kotabumi, 06 Desember 2016
DS

WEWAYANG SEMI

wayu tumelung
kawur anyawang semboja biru
ngruket ati
ing tritising sepi

crita lan sliramu sing sumare wingi
nebet tansah mili
dakarah ijo ngungkuli
ngrembuyunge karang kitri

crita lan sliramu sing sumare wingi
dakdhekep kenceng keket ngungkuli
poma mbesuk sirna sumewa bali

dupi tumelung wanci
ndhedhet mamring jroning ati
rumpil
napaki dina mburi
kang tansah beksan kumanthil
nggeter mblerengi

Kotabumi, 06 Desember 2016
DS

GURITAN WAYU

tumenga nyawang endahing purnama
tumoleh nyingkur cathetan muspra
keket angregem guritan wayu
aksara nebet temumpang tatu

apa wis boktampa, nimas
kojah sewu pamiluta
sora pambengoke rasa
ing gegana ngumbar crita
ing sawayah lingsir wengi
sangisore sitaresmi
apa isih ndhuweni..?

Kotabumi, 04 Februari 2016
DS

GATRA TATU

dohing panyawang
nyingkur laku seprene
kelu jero ngreranta
kapang

ing pangiraku
isih ana gurit ayu
sesekaran ngrenda wektu
ngrajut esem lungsete tatu
tilas wewiru

o kama, o ratih
apa ana kang luwih endah
saka amem esem kang semu
saka netra cowong kelayu
ing pasuryan panggurit rangu
:ngaras lan ngekebi katresnan wayu

Kotabumi, 23 januari 2016
DS

ANGGUR ABANG

wengi rumambat anguja rangu
alon dakcecep legimu eman
melip angen ngawiyat biru
ngentha rembulan sesunaran

gapuk impen lena ing wektu
mubeng sapala gegancangan
adreng lumebu segara madu
ing anggur abang ngudhar sambatan

geter-geter sloki ing tangan
kawur wewayang samar kadulu
sewengi klebus cicire inuman
getir tan uwal ngregem kridhamu

Kotabumi, 22 januari 2016
DS

GURIT KAYANGAN

(jaka tarub)

ya gene isih bokgurat aksarane mlathi
nganggo lungiting ganda crita luh wingi
atose watu wis ora nampa
reroncen ngliga asmaradana

geneya terus bokkidung sarung jagung
kanthi tembung-tumbung lintang keduwung
kekejera kaya ngapa
impen iku wis wayu kedaluwarsa

ya gene terus bokgurat aksarane mlathi
nganggo mingseg kapange nawang sari
kamangka rembulan uga wis paring werdi
yen ta aku saiki wis bali jejer widadari

Kotabumi, 28 Desember 2015
DS

GURIT KAYANGAN

yen sendhang wus kadung mambu bathang
aja mbok gadhang kledhange sampur abang
watu gilang wus ajur sewalang-walang
nawang wulan lawas bali nyang kayangan

Kotabumi, 22 Desember 2015
DS

MUNGGWA ESEMU NGAMBAR

getir mulasi tawanging crita
napas lawas rina wengi liru sepa
abang getih pingget jero nggurat dhadha
nostalgia mili ngeleb sayune rupa

saungkure rembulan
dhedhet langit tintrim bun ing plataran
ati rangu ngaras duwung kasunyatan
jejel riyel ati kesel kerahinan

jumangkah ngiring surya makantar
lampah laku samya samar
angajab arum mekroke mawar
surup kok papag esemu ngambar

Kotabumi, 18 November 2015
DS

K A P A N G

udan dhek bengi
semi pucuking mlathi
miyak crita kawuri

eling semana
kawitan tempuking netra
liwung jagad rinasa

liring mbok balang
nunjem dhadha kumrangsang
lelimengan

kebak pangentha
endah runtung ing mega
kombul lelana

kadadak jugar
gludhug mblandhang angampar
kluwung awurung megar

nglokro sedheku
pupus amarikelu
bareng wewayangmu

telung ketiga seprene
impen isih sumendhe
ing langit kene

dak lali-lali
ing ireng letheke kopi
legi tansah mili

slendhangmu abang
kobar mawane mbranang
dasih, ati sun kapang


Kotabumi, 07 November 2015
DS

WEWAYANGMU

ana kang lair saka wewayangmu
nggeterake ilining janji legining madu
ngracik impen-impen angete dalu
wong bagus, aku gandrung ing sewu taun pangrengkuhmu

Kotabumi, 29 Oktober 2015
DS