LAYUNG JINGGA

Layung jingga
Wiwit ngliga
Mungkasi gumelaring candhik lelayarane mega-mega
Nggiring angslupe bagaskara
Ing gigire cakrawala

Yen ta pucuke sore iki bisa crita, Yayi
Ana luh kang kutah
Ana ati sing bengkah
Rikala kapang ngundang baline jangkah
Saka tlatah samune pangumbaran

Ing pucuke sore iki
Dakronce pangrasaku ngenut lakune angin
Ngupaya lebur ana kandhutane mega
Sanadyan ta mung pengangen kang lana
Lan muspra ing sajroning pangentha-entha

Ya ben ta wengi iki sepi-sepi
Ya ben ta kapang iki nglinthing kalindhes katreme wengi

Kotabumi, Lingsir sore
DS

WENGI ING PANGLAMUNAN

Daksekarep angen iki
Nlasak bebondhotan kawuri
Duk rikala isih sesandhingan
Mecaki dina-dina
kebak puspa

Wengi ing panglamunan
Lungkrahing raga kaselehake ing peturon
Sangisore empyak prethel
Lan gapuke usuk
Bisu

Isih ajeg kaya wingi
Saben wektu atiku njelu
Njintel ngringkel dadi pringkilan kangen
Sabab rerangken
Wus mlenceng saka tataning impen

Ati iki pindha
Tlatah kapang kang gumawang ing pangangen sepi
Tininggal onclang gayutane ati

Kotabumi, 01-06-2012
DS

SOCA SAYU

Soca sayu
Kawistara edhum nyunarake paite pepisahan
Ngelun sakehing citra rasa
Ndhadhung cidra
Wungkul ngrenggani wewiron duhkitaning nala
Minggetake sisa-sisa lelakon, sing kala-kala malah nyipta panalangsa

Soca sayu
Legeg-legeg amarikelu sedheku
Mendhem raga dadi awu
Sangga wang nyawang langit werna klawu
Tan kendhat lilih ilining banyu
Netramu

Kotabumi, 20-05-2012
DS

KORI SINANDHI

Teneh apa, apa meneh sing dakranti
Teneh apa, apa meneh sing dakantu
Sauntara wengi wus nyebar mayuta sepi

Gusti, gawa'a aku ing jagading lali
Kareben
Karoban Ing katresnan jati
Nyawiji marang Asih-MU

Ing pasepen kori sinandhi
DS

MEH RAHINA

Wus meh rahina
Sepi datan arsa nendra
Kekesing rasa
Karudapeksa dening jatmika rupa
Kasendhal kumlawening wewayangmu
Ngakasa ilang watesing panyawang
Gawang-gawang

Wewayangmu
Kuwawa Ngegodha rasa
Tansah kumanthil aneng pandhoming netra
Linali-nali saya ngalela
Rinasa saya karasa
Tumus ring tung-tunggging nala
Datan kandheg dening apa-apa

Lan kabeh mung dadi siksaning pangimpen
Sabab sedya wus nyabrang pepesthen

Kotabumi, Meh rahina
DS

PANGGRESAH

Jroning panggresah
Nratap pikir nutuh pangangen-angen
Sumendhal sumedhot rasaning driya
Satemah mbabar lilihing rasa
Binarung kekembeng waspa

Kumrangsanging rasa
Saka gempalaning driya
Tansah ngagodha
Mbalela
Ngampah duhkita

Lungkrah raga iki dakselehake
Sayah pikir iki dakleremake
Ing dipan tuwa jero kamarku
Winates bisa tinemu anglere turu
Nadyan, tanpa impen-impen sing wingi dakwiru

Kotabumi, 13-04-2012
DS

MOSIKING ATI

Eluh trenyuh ngembang gugur
Mrebel nelesi ati kang wingit
Nguntabake pasiksan
Sing salawase iki pingget ing ati

Satemene ati iki wus lungse
Kabuncang ing tlatah samun
Cengkar bera lan nglungka
Nora kuwawa

Sayah anggonku lumaku
Mecaki dalan rumpil kebak tatu
Ing kene pengen dakleremake
Mosiking ati ing rerangkule wengi

Sanadyan ta pedhut isih anggendanu
Nutupi celong praupane rembulanku

Kotabumi, madya ratri
DS