S E P A

yen pedhut dhong rumambat
ngaras pucuk-pucuk mlati
lan bun wengi tinaretes
ngeleb plataraning ati
aku eling sliramu, Yayi

saungkure rembulan nguntabake lungamu
wengiku ngulandara
sesidheman mring sireping kapirangu
sepa, tanpa wirama
swasana kang rinonce awit kahanan kang mingget ati

Gusti...
kadiparan anggonku,
nglari sesotya kang wus musna saka embanan....?

Kotabumi, Madya ratri
DS

PANGANGEN

Sumilire angin silir ndlidir
Rinasa edhum lelumban pikir
Nrabas dawane wengi

Nglari ilining wektu
Njangkah angen nguyak impene ati

Maspadakake lintang rembulan, Yayi
Runtang-runtung njangkah mecaki tawang
Rerangkulan, tetembangan
Andum tresna mawa asmaradana
Nganti purnaning mangsa

Ampuranen aku, Yayi
Mung bisa ngronce manising esemu
Mung bisa ngentha kasulistyanmu
Awit aku mung kepengin
Sliramu tansah ana ing
kedhep lan ereme tlapukaning netraku

Kotabumi, 26-09-2012
DS

P U P U S

Dak sampirake pangarep-arep kebak wewayangmu
Ngupiya nylamur pangeling-eling ngegla ing dhadha
Rasa sepi lan kalunta
Kang wis ora geduga rinengga lara

Mabura
Sakombule langit
Slulupa
Sadedeg telenging samodra
Lepasa
Sakjembare ara-ara
Sagungliwunge wanawasa
Dimen ilang sakehing duhkita.

Kotabumi, 15 september 2012
DS

LINTANG SIWI

Alum-alum tumiyung
Malengkung
Kucem surem tanpa surat mangguwung

Lintang siwi
Ngiwi-iwi
Kumrelip ngrengga kangene ati

Besuk kapan kalakone
Baya kapan dumadine
Nyandhing slirane, Yayi.

Kotabumi, 06-09-2012
DS

CIDRA-MU

Nglambrang nglangut
Lir wulan ketawang pedhut
Ngajab kalodhangan tinebak luput
Cacahing wilang kinukut
Tanpa pagut

Katresnanmu

Yagene mung kokampirake ing panglamunku
Yagene mung dadi impen-impen endahku
Wungkul ing alam maya paite katresnanku
Memerih tatu tlapukaning netraku

Tirta lelayu
Worsuh nyemoni pandulu
Sakwuse cidramu
Nilasake tatu
Nggarit atiku

Kotabumi, madya ratri
DS

ELEGI WENGI

Kinanthi kidung lir gumanti
Ngaru-ara sauruting rumambate angin
Ngaras reroncening ati

Nitih nam-naming batin
Kang ginubel ing
Jembaring pangangen-angen

Nyuntak impen-impen
Nganam rasa lawan ganthilaning sukma
Dimen biruning langit atiku
Bisa dakgambari manising esemu
Bareng kumrosaking swara wit-witan
Keterak angin lelaku

Kotabumi, 26-08-2012
DS

P R A S A S T I

Angin angidid alon
Sumrambah gandaning sekar
Mbarengi rembulan kang lagi ndadari
Kairing kidung sonyaruri
Njanjeni swasana endah anglam-lami

Njawat astamu wong ayu
Lungguh sumandhing wadag

Lingga sumandhing yoni
Bebarengan nyangkrik nduwuring prasasti
Mawa asmaradana ing madya ratri

Apa kowe isih kelingan, Yayi

Kotabumi, 04-08-2012
DS