ASMARADANA

wis ilang watese, kang
guritku lan guritmu wis manjing ing rerakiting ukara
nalika gatra mbaka gatra
kojah ngidungake sekar asmaradana

apa wis kok pasangke rembulan ing tawang kita
dimen petenging wengi ora meneh dadi memala
lan lintang-lintang bisa lelangen maesi mega

apa wis kok kemuli hyang bagaskara
dimen katrem anggone nendra
dimen lali nyunari marcapada
lan wengi iki umure dawa

wengi-wengi lan sliramu
sengsem anggonku.......

Kotabumi, 24-08-2013
DS

GURITING ATI

aku ngerti, kang
yen wengi iki kowe maca guriting atiku
sing dakanggit bareng sumilire bayu
natkalane kapang wus ora bisa kawengku

wacanen kanthi permati
kepriye carane aku kenalan karo rembulan
paseduluran karo lintang
lan memitran karo konang-konang

mbokmenawa kowe kepengin ngerti
kepriye anggonku nggusah sepi
kepriye rutuh lan kumrebele luh iki
dadi kali cilik sauruting pipi
nelahi wengi mbaka wengi
ngupadi werdining sepi

Kotabumi, ratri mulya
DS

EMBAN KENCANA

pangangenku gremet-gremet lumaku
ing endah warnane gegayuhan ginadhuh
ing sumrebak gandane mlati
kang tumungkul mendem donga asmara
mapak mangsa wohing janji wenang diundhuh

emban kencana
kumelap ngrengga driji sing kiwa
minangka tandha
kembaring rasa
sumarahe jiwa raga lan tresna
katur ndika

Kotabumi, 28 juli 2013
DS

BAB SLIRAKU

Ora ana crita liya
Sing bisa dikandhakna wit-wit lan rerungkudan
Saben daktlusur dalan iki

Kowe keplatrang ati, kowe keplatrang
Ora ana meneh sing bisa kok lari
Nganti tilas tapakmu sing wingi
Wis ilang kesaput udan sewengi

Saparan-paran
Nrethek nglancak gegalering marga
Prandene kepanduk gatining kanyatan
Nanging menawa ana tumlawunge kidung lan beksan
Aku iki ati kang kasmaran

Kotabumi, 05, juli 2013
DS

NGENANI BAB SLIRAMU, DYAH

Sorene sore jingga
Candhike maya-maya
Laraping hyang bagaskara
tumrawang ing sakselaning mega

Ringkih anggamu
Dak kekep wiwit wayah candhik ayu
Aku kepengin ngopeni crita lawas sing kacicir
Mangerteni lelakon-lelakon sing nate kesungkur
Lan impen-impen kadaradasih
Sing sasuwene iki durung bisa tak sembadani

Ringkih anggamu
Tak pondhong mbiyak korining wengi
Binarung kumandhanging tembang kinanthi
Lan lulut seblak sampur beksan karonsih
Atiku sumyur campuh getih
Asih

Bebarengan lan sliramu
Nora karasa wis meh lumaku sewindu

Kotabumi, 23 juni 2013
Dening : Tejo Siswoyo
Kanggo : Dyah Sekartadji

DYAH

Kembaraning karep
Saikine wus jangkep
Dene winih gurit sing nate gogrog ing atiku
Wis tuwuh ngrembaka
Mekar tumangkar nyulami cakepane gending semaya

Mula, Dyah
Esem manis pawewehmu wingi
Wis bisa nentremake ati
Nadyan ta langit laburan peteng
Nadyan ta pedhut memalang laku
Aku ora samar
Awit konang-konang wengi
Awit lintang-lintang siwi
Wis pindhah mapan ing netramu

Kotabumi, Madya ratri
Dening: Tejo Siswoyo
Kanggo: Dyah Sekartadji

KAPANG-MU

Ing ngendi kapangmu, kakang
Sing biyen tanpa leren mecah kasepen
Lumantar swaraning tembang ombak katresnan
Kang gumulung ing segaraning atimu

Ing ngendi kapangmu, kakang
Sing biyen wani nrajang sepi ngoyak kelipe konang
Banjur kok pasangke jroning netraku
Sing jare bisa gawe padhang wengi-wengimu

Kijenan
Mung bisa ngetung lintang-lintang
Mung bisa nganggit konang-konang
Ah, yagene kapangmu durung gumawang

Kotabumi, 07-04-2013
DS