DEDALAN RUMPIL

nebet tetesing luh
ngukir lembaraning watu
tipak tipete katresnan

ya gene isih mangu...?
miyak rungkut ri bebondhotan
lakon kawuri

apa sih bisa nasak wewengkoning wektu...?
ing jangkah sing wis kadung
kelangan lacak dina mungkur

apa sih bisa nyingseti...?
getase tetalian batin sing satemene luput yen terus dirumati
amrih ora ketaton ing pungkasan

ing pucuk pring montang-manting
urip lan nasib nangis bareng guling-guling

Kotabumi, 31 juli 2015
DS

CANDHIK AYU

candhik ayu
nyungging tintrim biru-biru
puspawarna lelayaran
gegancangan ngambar wingit
liring mbranang pojok langit

nasak angen ngulandara
ngekeb tembang-tembang alum
awur esem angreridhu
kaya semana kidung ngumandang
: candhik ayu sumunar netramu

Kotabumi, 30 juli 2015
DS

GURIT SAPADA

bedhug ndhrandhang
ngenthang gilar-gilar
nggarang pangangen
ati sing kangen

Kotabumi, 30 juli 2015
DS

DHUH, GEGADHANGAN

ndulu saka pringgitan
nggetuni kedhepe lintang
endah semana reruntungan
pereng cahya nebet wewayang

wengi gumingsir nyawang kalangan
silir sirep angelam-lami
angubub kobar mawane eman
kidung angrangin ati

kelu ngreranta kapang
bun njekut ing plataran
ginantha wus kabacut gothang
dhuh, gegadhangan....?

Kotabumi, 20 juli 2015
DS

IKI MENGKO NGANTI KAPAN

langit mung ukara-ukara sepi : kiraku sih ana gunem...?
praupan rembulane katon nglentrih
burem sunarmu kekaling
apa kowe isih eling...?

ing ngendi parane angin
hawa adhem sing nyunggi rempyake ati
lan pringkilan kangen kang tansah
: njejuwing

ing ngendi lungane mangsa ketiga...?
nyangking beninge banyu kali
lan mangsa bedhidhing ngeburake
: godhong garing
(Iki mengko nganti kapan?)

Kotabumi, 15 juli 2015
DS

WENGI PUNGKASAN

bun-bun rutuh gineget
alon ing sumilire angin
biyen dak regem drijimu keket
ing netramu nimas, gendhing angrangin

riwe-riwe kalen ing pipi
dak usap geter anget rinasa
mingseg angemu anggeget lathi
ing dhadhaku kok kojahke pangaruara

kawur panyawang tempuking netra
mangsa bedhidhing nenutuh ratri
kekeba kenceng clerem semaya
sigra bali mengko wanci mekroke sruni

Kotabumi, 14 juli 2015
DS

MARANG REMBULAN

apa sing mbok gawa : rembulan...?
cahyamu edhum aneng arasing mega lan
lulut seblak beksan kartika
manjer wengi ing kedhepe liring
katresnan

apa wus mbok pikut kumrosake alang-alang...?
apa wus mbok paesi cengkare lemah gragal...?
engga gumerit cendhelane prawan sunthi kawiyak
lan anget sunarmu ngelus tintrime bun
: ing pipine...?

Kotabumi, 10 juli 2015
DS