Daksebul banter Kumelune pega rokok ing dhadhaku Prasasat nguncalake wewayangmu
Sauruting wengi kang sepi Dakjar wudhar sekehing rerangken Dakuja mbuncang ewoning pengangen Daklempit impen-impen kang blereng Sabab wus daklirwakake sliramu Saka atiku
Lan nalika bali daksawang langiting atiku Kabeh wus bali ireng Kabeh wus bali ireng
Layung jingga Wiwit ngliga Mungkasi gumelaring candhik lelayarane mega-mega Nggiring angslupe bagaskara Ing gigire cakrawala
Yen ta pucuke sore iki bisa crita, Yayi Ana luh kang kutah Ana ati sing bengkah Rikala kapang ngundang baline jangkah Saka tlatah samune pangumbaran
Ing pucuke sore iki Dakronce pangrasaku ngenut lakune angin Ngupaya lebur ana kandhutane mega Sanadyan ta mung pengangen kang lana Lan muspra ing sajroning pangentha-entha
Ya ben ta wengi iki sepi-sepi Ya ben ta kapang iki nglinthing kalindhes katreme wengi
