ARAK-ARAKAN GEGURITAN NAWANG WULAN

Senin, 28 Desember 2015

GURIT KAYANGAN


(jaka tarub)

ya gene isih bokgurat aksarane mlathi
nganggo lungiting ganda crita luh wingi
atose watu wis ora nampa
reroncen ngliga asmaradana


geneya terus bokkidung sarung jagung
kanthi tembung-tumbung lintang keduwung
kekejera kaya ngapa
impen iku wis wayu kedaluwarsa


ya gene terus bokgurat aksarane mlathi
nganggo mingseg kapange nawang sari
kamangka rembulan uga wis paring werdi
yen ta aku saiki wis bali jejer widadari


Kotabumi, 28 Desember 2015
DS

Rabu, 23 Desember 2015

GURIT KAYANGAN


yen sendhang wus kadung mambu bathang
aja mbok gadhang kledhange sampur abang
watu gilang wus ajur sewalang-walang
nawang wulan lawas bali nyang kayangan

Kotabumi, 22 Desember 2015

DS

Kamis, 19 November 2015

MUNGGWA ESEMU NGAMBAR

getir mulasi tawanging crita
napas lawas rina wengi liru sepa
abang getih pingget jero nggurat dhadha
nostalgia mili ngeleb sayune rupa


saungkure rembulan
dhedhet langit tintrim bun ing plataran
ati rangu ngaras duwung kasunyatan
jejel riyel ati kesel kerahinan


jumangkah ngiring surya makantar
lampah laku samya samar
angajab arum mekroke mawar
surup kok papag esemu ngambar


Kotabumi, 18 November 2015
DS

Sabtu, 07 November 2015

K A P A N G

udan dhek bengi
semi pucuking mlathi
miyak crita kawuri

eling semana
kawitan tempuking netra
liwung jagad rinasa

liring mbok balang
nunjem dhadha kumrangsang
lelimengan

kebak pangentha
endah runtung ing mega
kombul lelana

kadadak jugar
gludhug mblandhang angampar
kluwung awurung megar

nglokro sedheku
pupus amarikelu
bareng wewayangmu

telung ketiga seprene
impen isih sumendhe
ing langit kene

dak lali-lali
ing ireng letheke kopi
legi tansah mili

slendhangmu abang
kobar mawane mbranang
dasih, ati sun kapang


Kotabumi, 07 November 2015
DS

Kamis, 29 Oktober 2015

WEWAYANGMU

ana kang lair saka wewayangmu
nggeterake ilining janji legining madu
ngracik impen-impen angete dalu
wong bagus, aku gandrung ing sewu taun pangrengkuhmu


Kotabumi, 29 Oktober 2015
DS

Minggu, 25 Oktober 2015

LELABUH SEPI

Sore anggurat lamise mega
Ing kana biyen angen ngrembuyung
Seprene nggubel angentha-entha
Lencir kuning ati sun wuyung


Lumingsir candhik mungkasi rina
Wulan tumanggal ing brang kulon
Jangkah mbenteyong nyingid sasmita
Paran nimas, bali jejer sakloron


Bali angembang winihe soka 
Dakgadhang saiki mekrok ing ati
Saya angambar nedheng ngrembaka
Tuhu lan setya nadyan mbrindhili


Kotabumi, 24 Oktober 2015
DS

Jumat, 16 Oktober 2015

LINTANG PANJER SORE

silir-silir angin ketiga
nggawa janji katresnan rendheng
andum sengsem sulih mangsa
ing wewayangmu nimas, panyawang blereng

kala gumingsir nebet ing ati
candhik mbranang amarikelu
panjer sore panglonging ati
kawur mrebel muwun kelayu

kelu nyeseg ngreranta
esem samun angrenggani
keket angregem liring semana
trisnaku ginawa mati

Kotabumi, 16 Oktober 2015
DS

MARANG NIMAS

surup anapak manglong
getir rasa andulu trenyu
nratab kroncalan atiku coblong
sora anjola muwun kelayu


kelu nyeseg ngreranta
ngiring kreta titihan
trisna kapunggel peksa
lerema bali mring ayunan


taun gumlewang perih rinasa
dalan rumpil amecaki
dak kekeb kenceng pangaruara
sun tangiske kangene ati


rungon-rungonen dhek biyen meling
kalane candhik dak papag bali
lampah laku nggleyong jonjing
aja sumelang nimas, sadurunge peteng dakjujul pati


Kotabumi, 14 mei 2015
DS

Selasa, 13 Oktober 2015

GURIT PATEGALAN


(Banowati)


apa sih kena dakdhekep kapercayan
godhong-godhong gogrog kadamu angin
: aking


daktintingi keceraning gita pangeling
napas lawas kang nggurat tatu sejarah
nalika gurit -gurit nyasak jurang
munggah grumbul ri pepalang
: paugeran
tilamsari patengganku

binarung bun lan tintrime mandaraka
marang angin kang ngaras nistha
wengi iki aku mung pengin kandha
remugane dhusta semana
isih dhedhelikan nunggu mangsa
: wutah bedhahe kurusetra


Kotabumi, 13 Oktober 2015
DS

Kamis, 08 Oktober 2015

GURIT PATEGALAN

(kurusetra)


sumedhot andulu
kawur tetesing waspa
rutuh mili kagawa
:silugangga
(tidhem langit ngawangga, ngruket anggane dyah ayu surtikanthi kang lagya nendra)

dhuh nimas
pepujaningsun
rembulan lingsir wus alum
tintrim bayu nggawa tembang-tembang
: pangrum-rum
(basukarna legeg nglenggana, nintingi esem-esem dasihe semana)

sing lerem anggonmu ngimpi
suk kakang madheg senapati
sung dharmabekti awit peparinge wibawa lan mukti
netepi lungiting janji
ngrumati luhuring budi

lilanana pamitku, nimas
aywa kingkin walangdriya
aywa kongsi ngrasa cuwa
kalamun ing sakmengko
tangisku bokwaca
(basukarna gung mili rinujit myat anyawang rupa memaniking tyas, gya nyandhak gendhewa aglis mapag njedhule bagaskara)

Kotabumi, 8 oktober 2015
DS

Minggu, 04 Oktober 2015

LANGIT NGASTINA

langit ngastina
tuna gumelar rasa
: katresnan liya


o, dewa
bokmenawa kowe uga lena


kamar biru
jembangan werna ungu
rerupan tatu


satriya tama
putrane pandu
kekejeran
ing ilining getihku
ngaras kudung
nglukar gelung
kebaya, tapih
ngliga kelarung


langit ngastina
tintrim tangis keduwung
: pangamun-amun


o, rejuna
baya kapan bakal kok ramut urip kang nistha...?


Kotabumi, 04 Oktober 2015
DS

Rabu, 30 September 2015

EPIGRAM BANDUNG BANDAWASA

Apa sih pijer nangisi crita
Abang getih rina wengi nggetun sabda
Napas tuwa pingget jero nggurat dhadha
Tan wurunga
Rara jonggrang wus malik dadi rerupan reca


Kotabumi, 30 september 2015
DS

Selasa, 29 September 2015

MARANG KANG NGRENGGANI KAENDAHAN

o, rembulan
apa yang mung wujud wewayangan
sing bisa kok pasrahake ing
samun ndhedhete lelakon ing tembe


apa sih kurang lungid
jemparing kapangku
saben wengi dak isis ing telenging rangu
kalane gendhewa sepi dak penthang
ing tengahe rasa gothang
:kelangan


apa mung edhume bun pangarep
Kang rumambat antaraning ulegane kareb
ngemuli duwung-duwung tlaga
nyenyet


marang kowe : jenengmu sapa...?
marang kang ngrenggani kaedahan
bokmenawa ana cicire crita-crita wingi
wengi iki daksekarep
ana patemone rasa sing ginaris ing lembare nostalgia


(nimas, iki wuyunging atiku, kang ora tau bisa cetha ajar omong marang konang, lan ngrembuyunge pang-pang gegayuhan)

Kotabumi, 29 September 2015
DS

Senin, 28 September 2015

SEKAR LANGIT WUS MEKAR

sekar langit wus mekar
:sesunaran

apa kowe ngerti, nimas
gurit ayu
tawang biru
ngenteni kledhangmu
ing kana : sangupaning mega
kaya semana runtung lelana
nyigar langit
ngaras kluwung
lelangen ing dampyakane lintang
ayuta

sekar langit wus mekar
:sesunaran
(duweke sapa...?)

Kotabumi, 28 September 2015
DS

Sabtu, 26 September 2015

TEMBANG ALUM

ngayawara binarung angin
nggetuni pang kang bacut sengkleh
Ing kene tempuk netra agawe goreh
Iba sun temokke ndika ing tembe waleh


ya gene isih mangu
nasak rungkut ri bebondhotan
njumputi awur esem, kedhep liring
ing rutuhe bun-bun ngrembuyung


o,nimas
Ana gumrininge pasuryanmu dak penthang
ing lungiting warastra kumelap, mbarubul saka tengahing tlaga
abang birune atimu, atiku
nyigar lagit sore iku


Kotabumi, 26 September 2015
DS

Jumat, 25 September 2015

REMBULAN TUWA

katrem anyawang rembulan tuwa
ngangen-ngangen sri tanjung
nadyan brindhil pang nora kuwawa
ngekeb ijo godhonge wuyung


lam-lamen biyen esem boksungging
arum kembang ing plataran
ngantri seprene kasempyok liring
jero ning ati banget kelangan


keli ili obahe wektu
tansah kumanthil ngawe-awe
apa sih bisa angrenda laku
ing guritmu nimas, dak tangiske rumpeg dhadha ing tembe


Kotabumi, 25 September 2015
DS

Senin, 21 September 2015

NIMAS LINTANG

o, lintangku
dudu luputmu sesandhingan
kumrelip ngrengga kluwunge rembulan
:sesunaran


dudu luputmu, nimas
dudu
aku kang ora tau duwe ati lanang
aku kang ora tau wani nyawang
:pasuryanmu
guritku wudhar
kuwanenku aclum
rerangken kasamun ing
rumpege gurung


ing kalodhangan iki
ing lungite duwung kanyatan
dak entha krelipmu
:sepisanan


Cuthelll...


Kotabumi, 21 september 2015
DS

Jumat, 18 September 2015

COLOMBO WENGI IKU

wengi iki aku wis macak ayu
kaya sebene malem minggu
mapag tekamu


wengi iki aku wis macak ayu
kudung jambon, paes gincu
slendhang sutra werna ungu
biyen pawewehmu


o, kangmas
aku kang ora tau
bisa kelangan mripatmu
bisa lali mring esemu lan
angete astamu ngregem atiku


(wengi iki aku wis macak ayu, kanggo sliramu)

Gejayan, malem minggu 2005
DS

MARANG NIMAS

dhuh, kaningaya ngapa isih mbok anggit ewon ukara
samar yen ta endah ing atimu tan cetha
kalamun katrisnan jati wus sarimbit peni
apa sih mbok petung tekane rina lan wengi...?


Kotabumi, 13 September 2015
TS

Jumat, 04 September 2015

BEKSAN KARTIKA

pasuryan mendhung
kawur anyawang mega
nalika amrik waspa rutuh
macak tangis-tangis lirih
impen kalindhih


o, nimas
aku wus sumadya
menthang langkap nyigar langit
nedya manah ngruket anggamu
mondhong ati gegancangan
lelangen ing kumrelipe beksan
:kartika


apa kowe wis nglenggana...?


Kotabumi, 04 september 2015
DS

Sabtu, 15 Agustus 2015

O, KAMARDIKAN

jejer-jejer
tharik-tharik
barisan sumaguh
batik lurik roncen sorjan
abang putih kothak-kothak
jare semanak


awan wengi medhar sabda
donga tetulak edhume lemah sangar
saguh-sumanggem njunjung prasasti
ngobar pangincim mbengkas angkara
ing waliking dimar ublik
ting miring sapinggiring dalan
panggadhang


O, kamardikan
luh abang mblabar mbanjiri
ati-ati kerahinan
nyawang bapak nganggo dhasi
ngisis gingsul pista kanikmatan
anggur abang bumi pertiwi


(sadalan-dalan atine kawula den udal-udal kececeran, dadi tumbal omah gadhen tanpa tebusan)

Kotabumi, 15 Agustus 2015
DS

Selasa, 11 Agustus 2015

K E D U W U N G

dak prangguli kekes punjere wengi
ngrangin panjerite suling dumeling
ing nglangut sepine lintang
ndhedhet langit kang ora tau nyawang
reroncene rembulan jembar kalangan

dak tintingi kidung tresna ngrembuyung
aku kang ora tau bisa ajar kenal marang konang
aku kang ora tau ngadhang angin kasmaran
pawewehmu wingi

o, nimas
aku kang ora wani
nyabrang kreteg impen kawuri
: kerahinan
kedhisikan sumorote surya
kanyatan

(tapel wates sinengker wingit, ngungun anyawang klawune anggit)

Kotabumi, 11 agustus 2015
DS

Senin, 10 Agustus 2015

ARUM DALU

jero ing atiku nimas
angin ketiga nyangking banyu katresnan rendheng
ngundang baline pucuk-pucuk semi
ngrembuyunge godhong jati


apa wus mbok pikut gumerite lawang kita
lan nyuguhake anggur ati
kanggo necep jatine rasa
ngrangine tembang-tembang kapang
ngambar arum gegancangan
nasak lungsete sepre abang


Kotabumi, 10 agustus 2015
DS

Jumat, 07 Agustus 2015

KLUWUNG RAHINA

pecak jangkah kekes rinasa
bun tintrim ing plataran
getun anyawang cathetan muspra
ing esemu nimas dak abur angenan


luweng nadhi nitir pangrasa
rumpeg ing dhadha nenutuh kapang
ngegeter eling liring semana
baya sarimbit bali ngegancang


ajeg lumaku nglangut ing rasa
kelu nalika wanci bang wetan semburat
sempoyangan nggendhong kluwung rahina
natas tumlawung wurung kinemat


kotabumi, 06 agustus 2015
DS

Jumat, 31 Juli 2015

DEDALAN RUMPIL

nebet tetesing luh
ngukir lembaraning watu
tipak tipete katresnan

ya gene isih mangu...?
miyak rungkut ri bebondhotan
lakon kawuri

apa sih bisa nasak wewengkoning wektu...?
ing jangkah sing wis kadung
kelangan lacak dina mungkur

apa sih bisa nyingseti...?
getase tetalian batin sing satemene luput yen terus dirumati
amrih ora ketaton ing pungkasan

ing pucuk pring montang-manting
urip lan nasib nangis bareng guling-guling

Kotabumi, 31 juli 2015
DS

Kamis, 30 Juli 2015

CANDHIK AYU

candhik ayu
nyungging tintrim biru-biru
puspawarna lelayaran
gegancangan ngambar wingit
liring mbranang pojok langit


nasak angen ngulandara
ngekeb tembang-tembang alum
awur esem angreridhu
kaya semana kidung ngumandang
: candhik ayu sumunar netramu


Kotabumi, 30 juli 2015
DS

GURIT SAPADA

bedhug ndhrandhang
ngenthang gilar-gilar
nggarang pangangen
ati sing kangen


Kotabumi, 30 juli 2015
DS

Senin, 20 Juli 2015

DHUH, GEGADHANGAN

ndulu saka pringgitan
nggetuni kedhepe lintang
endah semana reruntungan
pereng cahya nebet wewayang


wengi gumingsir nyawang kalangan
silir sirep angelam-lami
angubub kobar mawane eman
kidung angrangin ati


kelu ngreranta kapang
bun njekut ing plataran
ginantha wus kabacut gothang
dhuh, gegadhangan....?


Kotabumi, 20 juli 2015
DS

Kamis, 16 Juli 2015

IKI MENGKO NGANTI KAPAN

langit mung ukara-ukara sepi : kiraku sih ana gunem...?
praupan rembulane katon nglentrih
burem sunarmu kekaling
apa kowe isih eling...?


ing ngendi parane angin
hawa adhem sing nyunggi rempyake ati
lan pringkilan kangen kang tansah
: njejuwing


ing ngendi lungane mangsa ketiga...?
nyangking beninge banyu kali
lan mangsa bedhidhing ngeburake
: godhong garing
(Iki mengko nganti kapan?)


Kotabumi, 15 juli 2015
DS

Selasa, 14 Juli 2015

WENGI PUNGKASAN

bun-bun rutuh gineget
alon ing sumilire angin
biyen dak regem drijimu keket
ing netramu nimas, gendhing angrangin


riwe-riwe kalen ing pipi
dak usap geter anget rinasa
mingseg angemu anggeget lathi
ing dhadhaku kok kojahke pangaruara


kawur panyawang tempuking netra
mangsa bedhidhing nenutuh ratri
kekeba kenceng clerem semaya
sigra bali mengko wanci mekroke sruni


Kotabumi, 14 juli 2015
DS

Jumat, 10 Juli 2015

MARANG REMBULAN

apa sing mbok gawa : rembulan...?
cahyamu edhum aneng arasing mega lan
lulut seblak beksan kartika
manjer wengi ing kedhepe liring
katresnan

apa wus mbok pikut kumrosake alang-alang...?
apa wus mbok paesi cengkare lemah gragal...?
engga gumerit cendhelane prawan sunthi kawiyak
lan anget sunarmu ngelus tintrime bun
: ing pipine...?

Kotabumi, 10 juli 2015
DS

Kamis, 09 Juli 2015

ASMARADANA

apa wus mbok pikut nimas
remeng manise kamar kita...?
sing nyuguhake anggur abang
kanggo nglabuh sepi
nyangking ambyore lintang
kemul angete rembulan
kanthi kapange prawan sunthi
lan getere dhadha iki
bebarengan ndhudah asmaradana
ing gumlegere ombak-ombak
: katresnan

Kotabumi, ratri mulya
DS

Senin, 06 Juli 2015

TEMBANG KANGEN

kaya uga sliramu
ing kene aku nyulami tatu
mburu susuhe angin
nasak sepine mega-mega
tawang alum pangareping tresna
semana


antinen nimas
angin ngiring tembang-tembang kangen
sumilir ing carang garing
nggawa gatraning gurit-gurit semi
kang bakal tumiyung sumandhing
: ing pangkonmu


Kotabumi, 06 juli 2015
DS

Jumat, 03 Juli 2015

KAPANG MRING LINGSIR WENGI

bun wengi dha leladhang
ngaras carang-carang semi
angen ing kana pagut kumleyang
wuyung kekidung kareb ngambali


ijen kasepen kapang ing rasa
makaping dak abur mring lingsir wengi
taman sih tawa aruming ganda
ejawantahe si kembang sruni


mosah-masih mecaki suwung
nyidham manis wektu patemon
sewengi adreng nggambari kluwung
dhuh nimas, ing kapan gapyuk asih sakloron...?


Kotabumi, 03 juli 2015
DS

Kamis, 02 Juli 2015

GURIT PUJA

gumonthang jam bandul : karebmu apa..?
nginger ngalun sulih mangsa
macak rembulan lan bagaskara
ora-orane aku bakal lunga
salumah murebe kasepen kang dawa
sadurunge wektu bisa maca
:cangkrimane kukus dupa


Ing pasepen kori sinandhi
DS

Jumat, 26 Juni 2015

GURITAN WAYU

lan aku isih ing kene : karo wewayangmu
maesi rembulan bitha-bithu
ah, bangete nebet tilas wewiru

apa salah yen aku saba ing tawangmu
lurung mega kang gawe ati keplantrang, kebimbang
apa salah yen aku nyirami kembang kang alum
apa aku keduwung ing eri mangu....?

lan aku isih ing kene : nganti lumingsire dalu
bebarengan bang wetan, ilang karo
:guritan wayu

Kotabumi, 26 juni 2015
DS

Rabu, 24 Juni 2015

LINTANG PANJER SORE

surup anapak nglangut
kethawilan ngranggeh bebaturane wengi
impen semana sarimbit pagut
panjer sore tansah mblerengi


candhik lamur kebak asih
ngliga angen sesunaran
netra kembeng alon lilih
ing cahyamu ngudhar sambatan


yutan larik gatra binuwang
sarwa geseh perih ing keteg
sesore ati ngekebi kapang
dhuh nimas, ing kapan mbengkas penyawang rumpeg...?


Kotabumi, 24 juni 2015
DS

Selasa, 23 Juni 2015

PETHIKNA REMBULAN BU

ing latar taman
arum ganda ngebaki wengi
kluwung peni kalangan biru
mimbik-mimbik neter panjaluk
jarik kawung ngemban tangismu


pethikna rembulan bu
pethikna rembulan
aku kepengin masang sunare
ing empyak bangka njero kamarku


pethikna lumintang bu
pethikna lumintang
aku kepengin masang krelipe
ing kedhep liring netra kang biru


pethikna rembulan bu
pethikna lumintang
arep tak nggo sangu turu
nyapih tintrim petenging dalu


kotabumi, 23 juni 2015
DS

Senin, 22 Juni 2015

K E K I T R A N G

wengi anapak manglong
metani kedhepe lintang
ngegla semana wulane moblong
sarimbit runtung angudal kapang


adoh kelakon rumpil jinangka
kangen sumampir ing pang turi
tansah gogrok lumiwat mangsa
lamun ta sak mengko bakal ndharbeni


mbacut lumaku ngiter angenan
mipil jembar birune tawang
ing panjer wengi nyutak tab-taban
dhuh nimas ati sun kitrang


Kotabumi, madya ratri
DS

Senin, 08 Juni 2015

LINTANG SINGIDAN

mumpung isih ana guritan alam kang ngukir lembarane wektu
tangia Yayi, nglipur sesotya
nembang katentreman
binarung bun lan wangine mawar angambar


mesakake impi
mung kok kemuli tilas wewiru
gombal amoh suwirane slendhang
panggadhang


mbokmenawa mung turahan rasa
kang tansah ngrujit biruning tatu
lan keliping lintang
wengi iku


kaningaya ngapa isih nggambari tawang
rembulan kae rak wus growal-growal
rupane wus potheng-potheng
saben wengi mbok cuwil kanggo nambali kapang


Kotabumi, 27 Mei 2015
DS

TEMBANG KAPANG

ana saperangan impen kuwi bali kumledhang
ndhungkari gegrumbul lan
pang-pang kang tumelung
prampang


lawas ing atiku, nimas
nggetuni sepira jerone tapak-tapak sing nebet
tumrap tatu-tatu sejarah dina mburi
ahh, munggwa biyen linabuhi


lekasa angambar sruni
ngruket ngalem ngganda wangi
kaya samangsa mekroke kembang
saguh sumanggem ngayomi ati


Kotabumi, 08 juni 2015
DS

Senin, 25 Mei 2015

DEDALAN DAWA

apa isih arep bali mungkur
dalanan rumpil roncen panggadhang
kamangka panase srengenge sansaya dhuwur
maneka kidung lerem den tembang


getir kelakon lawas jinangka
adreng kareb saeka kapti
krenteg sarimbit ngemban sesotya
saiba endah sakmengko ndarbeni

candhik wis ilang nglangut ing tawang
pereng pedhut ngobar panggresah
sing ajeg jumangkah nimas, surupe wus gumlewang
brang kulon kana pantoging jangkah

Kotabumi, 25 Mei 2015
DS

Senin, 27 April 2015

CANDHIK PUNGKASAN

pantog jangkah kandheg ing kene
candhik mbranang ing pandulu
aja tumenga nimas, surupe wus sumendhe
perih ning ati ngecul tanganmu


trenyuh pepisah abot nggoceki
mamring rasa kasendhal mayang
gapuk ngregem tan kuwawa nampi
lungamu ing tlatah sabrang


aja keguh jumangkah laku
bacuta mlumpat ing protelon
den lajer liring sarta gumuyu
wis pungkas wektu kanggo sakloron


rangu andulu dalan sisihan
kareb nggregel tansah mangro
kebak pitakon ing angenan
apa isih ana esem kae sakmengko...?


Kotabumi, 22 april 2015
DS

Minggu, 19 April 2015

WATES PANGGADHANG

matumpuk uwuh ing latar taman
ajeg angembang ngganda angambar
adreng kareb sesandhingan
mekroke mawar ngrantu panglamar


kebak pitakon ing candhikala
lungkrah bayu sora anjelih
apa jangkah isih ngrembaka
makaping gogrog mangsa kasulih


bulak tintrim langite surem
bun njekut ngusap pasuryan
gregel amblabar tansaya njarem
nglangut tetangis ing pungkasan


Kotabumi, 19 april 2015
DS

NGAWIYAT BIRU

lam-lamen sarimbit nyawang purnama
ing kana biyen cetha mboksungging
mekroke kembang nglegani gantha
njlarit kluwung angganda ngliling


tempuk liring ketawang manis
keket dak regem drijimu geter
angemu madu tapising riris
ati anratap kumesar ajer


makaping sasi mangsa lumiwat
crita jumangkah mung mandheg mangu
nebet kangen esem ngujiwat
kobar impen ngawiyat biru


Kotabumi, 16 april 2015
DS

Sabtu, 11 April 2015

PANGLONG KAWURING KANYATAN

panglong peni ing mamring kluwung
nglambrang ngranggeh liring sumendhe
lungkrah bayu angrengkuh wurung
kandheg ing padhang kagol langite


plethek srengenge angubub kapang
ngobar impen mawane eman
ngunggahi kareb mataun ngglewang
ngekeb edining pangenthan


getir amblabar njola anganglang
windu lumaku nutuh kanyatan
tipak wus kawur ing panyawang
ngungun angaras wayu guritan


Kotabumi, 11 april 2015
DS

Minggu, 05 April 2015

KEMBANG TURI

(Lingsir sore, ngronce impen semana kang ngawe-awe)

Nglayung mecaki lurung kang lungit
krenteg anyawang grumbul semaya
Dalan rumpil angrerujit
Saiba katrem pang-pang semana


Aclum ngadhep angen tumelung
Adreng ngaras kembange turi
Biyen godhong ijo ngrembuyung
Lena ing mangsa gogrog mbrindhili


Surup anilap kaca pasuryan
Trenyuh kekanthen njejuwing ati
Candhik wus sumyur ing angenan
Perih andulu petenging wengi


Kotabumi, 5 april 2015
DS

Kamis, 02 April 2015

KALANE SURUP ATI KEPLANTRANG

sumedhot nguntab alon jangkahmu
rumpil dalan amecaki
mingseg anggeget lathi angemu
kawur panyawang mrebel nelesi


warsa gumingsir amarikelu
crita wus akeh sing kalepyan
nyapih kahanan kang keplayu
ngungun andulu lurung pungkasan


yutan angen wekas tangisan
bareng kelingan surup gumlewang
ndedel njola pitakonan
maring sapa dak wadul kapang


Kotabumi, 2 april 2015
DS

Selasa, 31 Maret 2015

NALIKA SURYA GUMLEWANG

mungguh dudu rumpile dalan
adreng kareb tansah lumayu
kebak pengarep sesandhingan
lawas kandheg ing pandulu


ngungun ngaras pangilon suwung
ngener lacak lakuning jantra
geter ati nganami kluwung
endahe trisna dhek semana

manglung srengenge ngosik larapan
ngrungkeb kapang kang kepati
sesore ati kebak angenan
wewayang panglonging ati

Kotabumi, 31 maret 2015
DS

Minggu, 29 Maret 2015

KEDUWUNG

madhani ati tawang kang suwung
pijer anganthi njedhule kluwung
ngrangin kekidung layung-layung
nimas, bangete sepa rasane duwung


Kotabumi, 29 maret 2015
DS

Sabtu, 28 Maret 2015

SINDHUNG PRAHARA

apa mung arep sesenthiran lenga patra
mukti wibawa lenggah bubut kencana
rembug gayeng bawarasa klawan kaki guru lan narada
isuk lan sore medhar sabda


ya gustiku, ya sesembahanku
dudu perkara landhepe kuntawijaya
apa ampuhe pedhang sokayana
kawulamu kae wus wareg tembung nggladrah
apa wayang-wayang rucah isih arep wae kok prentah


apa ora isin noleh mburi
janji-janji wus kaukir dadi prasasti
kawulamu kang urip pinggir kali
impene pijer ilang kenyut keli


ngelinga
yen ana songsong tunggul naga
megar wayah candhikala
lan jamus kalimasada kelangan aksara
iku pratandha kursi sejati wus malik dadi
siyunge banaspati


(sadalan-dalan aku weruh dhewe impene kawula den udal-udal
kececeran turut lurung turut tegalan, swarane tumangsang ngebaki ayang-ayang).


Kotabumi, 28 maret 2015
DS

Jumat, 27 Maret 2015

TRESNA SUDRA

yen pancen ora ana rasa percaya
wis ta yayi
aja pijer pangaruara


pancen burem kaca sapa aku iki
aja ketungkul ngenteni sitaresmi
tunggak jati ora mesthi kudu semi


ora bakal ana pethite kala
ora bakal ana lidhahing bagaskara
lan pepadhange urip kebak mutyara


sangarepku mung pang-pang semboja lan
maesan tuwa wewangunane sudra


Kotabumi, 27 maret 2015
DS

Senin, 23 Maret 2015

K A Y U N G Y U N

sepira dawane ati
kang jumangkah ngemu sewu wewadi
lir konang kang pijer rebutan dolanan geni

sapa kang nyimpen sepi
ati adreng mawas pucuke jati
kang gumelar samar ing laladhan sepi

bokmenawa mung kadereng angen
sepi ngambung lingiring amem
sing nuwuhake tatu berem

apa merga trisna wus kelangan pangaribawa
kelunta-lunta ajer ngelus pitakon dawa
:dasih, bangetku kapang kepengin wujudmu sanyata

Kotabumi, 23 maret 2015
DS

Sabtu, 21 Maret 2015

SRENGENGE WUS SUMENDHE TAWANG

(nalika angin wit sumilir, ya gene kowe ndadak nglilir)

apa isih ndadak mamerake perih
nalika wektu prasapa marang curesing warih
pijer ngrerepa ngarih-arih

apa isih ngaru-aru pengin bali
nepusi kontale tali asih sing wus getas
dipangan angin lan panas

lan aku wus nglenggana
lelandhesan rasa eklas
sing ora cinupet dening kanyatan

mungguh jembaring kalangan
aku wis marem nyawang lintang

kotabumi, 21 maret 2015
DS

Kamis, 19 Maret 2015

EPILOG KUNTHI

O, Kunthi
ya gene isih pijer ngesok eluh garing
ing ara-ara sepi mamring


gya rucaten kabeh lelakon
kang ngrerujit rubeting tapih
kareben bisa nglalekake critane bayi abang
sing boktinggal lunga ing sapinggiring banyu bengawan
tan wurunga
basukarna wus pralaya ing tegalan
kurusetra


Kotabumi, 19 maret 2015
DS

Rabu, 18 Maret 2015

K A L E P Y A N

apa isih ajeg miwiri kangen
kanggo ngungsekake rasa perih
kang suwe ngelak pangusap
kareben bisa maca ayang-ayange
kaya samangsa crita isih sumendhe


ywa kongsi adreng jro ulegan
anut paraning camar kasmaran
tumlawung kekiter wewuyungan
tan wurunga
sesotya wus musna saka embanan


(pijer tembang ngrujit tangis tawang-tawang, kalepyan crita mungkur kacintrakan).

Kotabumi, 18 maret 2015
DS

Selasa, 17 Maret 2015

NALIKA SONYA ANELAHI MEGA

wis adoh jangkahe
awangun sandi asmara
mecaki dalan sidhatan
rungkut landhepe ri bebondhotan


ya gene
isih ana salarik panggresah sing gogrog
samangsa tawang wus ora saguh kenunutan
damar pandoming pepadhang


banjur apa
paripeksa dakpunggel sepa
kaya samangsa angslupe bagaskara
nalika sonya anelahi mega


Kotabumi, 17 maret 2015
DS

Sabtu, 14 Maret 2015

ORA MAIDO

pet tawang'ira sintru ing rasa
kalamun ngreksa kledhang wewayangku
jer nuwuhke kabiwada deduka
aku mung lintang siwi
sing ora nduweni aji
kanggo jejer saresmi
tumrap purnama sidhi

kotabumi, 14 maret 2015
DS

Kamis, 12 Maret 2015

SAIRIS CRITA

aja sliramu banjur nduweni panduga
aku dudu bandung bandawasa kang mapag playumu
nalika sewu candi wis kasil dakripta


aku uga dudu rangga lawe
kang bakal nagih janji
nalika kasil ndobrak benteng singosari


awake dhewe uga dudu basukarna lan arjuna
sing kudu adu gaman ligan ing palagan kurusetra
ing patemon iki aku mung pengin kandha
iki anakmu genten openana


kotabumi, 11 maret 2015
DS

Selasa, 10 Maret 2015

NGLENGGANA

yen pancen langit kudu diiris
wis ta yayi, aja ketungkul pijer tangis
ora-orane yen crita iki bakal malih dadi wengis


angger guyumu isih katutan bayu
nyilakake mendhung klawu
lan astamu isih kuwawu
ngaras bedhekane langit biru
nadyan dudu purnama sing dak pajang ana
tawang atiku


Kotabumi, 10 Maret 2015
DS

Minggu, 08 Maret 2015

ING DINA KEBAK PUSPA

sing teka padha asung pandonga
kekanthi bebungah werna lan rupa
sawuse dhampar kencana dilali wengi
kamar penganten bali sepi


Malang, semana 2006
DS

Rabu, 25 Februari 2015

SISIK PANGGODHA

wengi wiwit jumangkah
kekemul pedhut kang peteng
legeg nyenyet
nutuh krenteg
esem kucem, ngrengga pojoke lathi


pengin dakleremake jangkah
kang sangsaya sayah negesi
rumpile dalan pangumbaran
adoh sinawang


pengin daklodhangake wektu ing kene
nggurit gatraning crita nalika wengi isih ngemu pitakon
samangsa kalangan wus ora saguh kenunutan ;
salaksa lintang, suluh rembulan


nyatane sing ana mung prasapa kumrelipe konang
kang mung apus-apus aweh pepadhang
nalika cangkrimane wengi isih durung bisa kabatang.


Kotabumi, 25 februari 2015
DS

Kamis, 22 Januari 2015

LAYANG MARANG KEKASIH

teneh apa
apa meneh sing mesthi daksranti
genah rembulan kae wis mlayu
nurut ilining ati tatu


aku wus kok lirwakake
ing kahanan kang linapis emas suwung
kanthi getering sepi asepah samun
kebak dening pangamun-amun


aku wus kok lalekake
ing kahanan gedhong pasiksan
kedhadhung, ketlikung
ing sepi keteg cuwilan tembung


pedah apa krelip sesotya
maesi endah saranduning angga
yen ta tanpa ana crita
ilining jantra madu branta


ati iki dudu...
reca paesan kiwa tengene gapura.


Kotabumi, 22 januari 2015
DS

K A N Y A T A N

ora kurang nggonku ngrerepa
manuhara nuju prana
parandene ora tumiyung
rembulane kekaling mendhung


ah, kekasih
sapa sing cidra sapa sing jinja
lakon iki dudu pepesthen
pijer iki impen kang kudu kasimpen
ing pojoke kangen


nanging branta wus rojah-rajeh
karajut dening kahanan
nyuwek jantungku
mbeler atiku
lan aku wus kebacut nyidra impen.


Kotabumi, 16, Januari 2015
DS