ORA MAIDO

pet tawang'ira sintru ing rasa
kalamun ngreksa kledhang wewayangku
jer nuwuhke kabiwada deduka
aku mung lintang siwi
sing ora nduweni aji
kanggo jejer saresmi
tumrap purnama sidhi

kotabumi, 14 maret 2015
DS

SAIRIS CRITA

aja sliramu banjur nduweni panduga
aku dudu bandung bandawasa kang mapag playumu
nalika sewu candi wis kasil dakripta

aku uga dudu rangga lawe
kang bakal nagih janji
nalika kasil ndobrak benteng singosari

awake dhewe uga dudu basukarna lan arjuna
sing kudu adu gaman ligan ing palagan kurusetra
ing patemon iki aku mung pengin kandha
iki anakmu genten openana

kotabumi, 11 maret 2015
DS

NGLENGGANA

yen pancen langit kudu diiris
wis ta yayi, aja ketungkul pijer tangis
ora-orane yen crita iki bakal malih dadi wengis

angger guyumu isih katutan bayu
nyilakake mendhung klawu
lan astamu isih kuwawu
ngaras bedhekane langit biru
nadyan dudu purnama sing dak pajang ana
tawang atiku

Kotabumi, 10 Maret 2015
DS

ING DINA KEBAK PUSPA

sing teka padha asung pandonga
kekanthi bebungah werna lan rupa
sawuse dhampar kencana dilali wengi
kamar penganten bali sepi

Malang, semana 2006
DS

SISIK PANGGODHA

wengi wiwit jumangkah
kekemul pedhut kang peteng
legeg nyenyet
nutuh krenteg
esem kucem, ngrengga pojoke lathi

pengin dakleremake jangkah
kang sangsaya sayah negesi
rumpile dalan pangumbaran
adoh sinawang

pengin daklodhangake wektu ing kene
nggurit gatraning crita nalika wengi isih ngemu pitakon
samangsa kalangan wus ora saguh kenunutan ;
salaksa lintang, suluh rembulan

nyatane sing ana mung prasapa kumrelipe konang
kang mung apus-apus aweh pepadhang
nalika cangkrimane wengi isih durung bisa kabatang.

Kotabumi, 25 februari 2015
DS

LAYANG MARANG KEKASIH

teneh apa
apa meneh sing mesthi daksranti
genah rembulan kae wis mlayu
nurut ilining ati tatu

aku wus kok lirwakake
ing kahanan kang linapis emas suwung
kanthi getering sepi asepah samun
kebak dening pangamun-amun

aku wus kok lalekake
ing kahanan gedhong pasiksan
kedhadhung, ketlikung
ing sepi keteg cuwilan tembung

pedah apa krelip sesotya
maesi endah saranduning angga
yen ta tanpa ana crita
ilining jantra madu branta

ati iki dudu...
reca paesan kiwa tengene gapura.

Kotabumi, 22 januari 2015
DS

K A N Y A T A N

ora kurang nggonku ngrerepa
manuhara nuju prana
parandene ora tumiyung
rembulane kekaling mendhung

ah, kekasih
sapa sing cidra sapa sing jinja
lakon iki dudu pepesthen
pijer iki impen kang kudu kasimpen
ing pojoke kangen

nanging branta wus rojah-rajeh
karajut dening kahanan
nyuwek jantungku
mbeler atiku
lan aku wus kebacut nyidra impen.

Kotabumi, 16, Januari 2015
DS