SUKRASANA TINEMU SEPA

+ Kakang mantri
bokmenawa aku sing kleru negesi tembung katresnanmu
ya gene saiki banjur bok selaki
marang janji sawuse rinengkuh mukti
(Bambang Sumantri mung legeg nglenggana, atine krasa trenyuh krungu panggresahe si Adhi)

- ohh adhiku Sukrasana
aja sliramu banjur ngemu rasa ora percaya
ngundhat-undhat lan nakokake sepira jeroning banyu bengawan lan
wujude rasa katresnaning pun Kakang

+ dhuh,Kakangku ya pepundhenku
selehen astamu kang adhem pindha salju ana bathukku
kareben aku bisa nglalekake critane buta bajang
sing ditundhung lunga sawuse mindahake taman

+ wangine kembang minangka sampurnaning kamulyan
tanpa ngelingi yen katresnan kuwi regane larang

- uwis Dhi, aja kok dedawa lara
ayo enggal lunga'a saka taman
bali mring pertapan jati srana
kae para putri padha kamigilan
nyawang blegermu sibuta bajang
(gendhewa pinenthang, ngagar-agar munthes luhuring katresnan)

+ ora Kakang, aku melu kowe
aku melu kowe Kakang
(Sukrasana nangis ngguguk ing antarane gebyaring lintang
pengarep-arep, kang sakala ilang katembus lungite jemparing katresnan)

Kotabumi, 29 Desember 2014
DS

GURIT KANGEN

aku rak ya isih dadi wewayanganmu ta, Kang
geneya ora nate kok aru biru
nganti lintang-lintang padha takon
ya gene rembulanmu kok panglong

nalika pang-pang trembesi sesidheman
ninggalake poncot dalan
lan wora-wari gogrok kasulih mangsa
ngabarake mring sliraku yen ta
mangsa ketigane isih dawa

aku pancen dudu sukrasana sing nagih janji
nalika kasil njunjung taman sriwedari
lan kangen iki uga dudu senjata kunta
kang bakal nembus isine dhadha

geguritan iki mung pengin kandha
wengi iki aku kelonana

Kotabumi, 21 Desember 2014
DS

K E S I N G K U R

pancen durung jangkep
kakah jangkahku
napaki dalan-dalan ing atimu
wong ayu

aku wis nglenggana
yen ta winih gurit sing tak dhedher ing atimu
ora bakal semi
awit ana tilas asmaradana
sing nate ngumandhang
dek semana

aja ketungkul kelu
ora bakal ana pitakon
ngenani sekabehing lelakon
nyatane aku mung bisa nyangking wewadi
lan crita-crita
sing mung saguh kokpapagi
jroning impi
Kotabumi, 13 Desember 2014
DS

CRITA SAKA TAWANG

baya kapan rembulan
bali leladhang nyithak topeng-topeng esem
kanggo aling-aling rupa burem
ngrakit bebungah
nurut iline napas sengsem

wengi pancen nduweni prabawa sing bisa nerak kahanan
lan aku asring kepranan
nyawang gumelare tawang
kang nglukis werna lan rupa
abang birune panguripan

ahh
mungguh bisaa

(panrawang nglambrang. werna lan rupa jejel riyel rebut bener ancase panguripan)

Kotabumi, 7 Desember, 2014 
DS

ISIH KASISA

isih kasisa
manise esemu deksemana
lan sampurnaning pepujan asmaradana

isih karasa
sempyoking banyu sengsem agawe esem
saka weninging tlaga pasuryanmu

ngenani sliramu
pancen bangetku angel kanggo
ninggalake wektu

(panrawang suwung, ngrenda katresanan semana kang ngrembuyung)

Kotabumi, 29 November 2014
DS

NGEJA AKSARANE KASEPEN

ambegan dawa
binarung kidung pangudarasa
ahh, mungguh rasa iku isih ana

pupus semu
luh lan esem iku
liru liring bisu

Gusti
ya gene pedhut kacubriyan iki
kok umbar rina wengi

ing pringgitan tritis kasepen
dak entha astamu
ngranggeh lan nelungake
pange impen

Kotabumi, 24 November 2014
DS

C U T H E L

dak ungkuri dalan-dalan rumpil
walaka aku wis jinja
kanggo ngenam cuwilane trisna

walaka aku wis kesel
nganglang kekiter wewuyungan
Ing ndhuwur tlaga wening pangarepan

dak kekepi impen-impen
ngaras duwung kasunyatan
ngebur lembar-lembar katresnan

(ping-pira lawase aku lan kowe, ketungkul nelungake pange rawe)

Kotabumi, 17 November 2014
DS

MAWAR ABANG

sagagang mawar abang
dak ulungke mring sliramu
wenehana papan kanggo kalodhangan
ing atimu

 

aja sanggarunggi
lamun akeh eri mangu
kebak wisa rupa biru

 

keket regema ing astamu
dimen mblabar getih asihmu
kinen kasdu binuka korining atimu

 

edhum netramu
sinungging esem semu
banjur bebisik ing talinganku
" Kang, aku wus ana sing ndhaku "

 

Kotabumi, 16, November 2014
DS

LEMBAR NOSTALGIA

rasane kaya mecaki dalan sing nate kaliwati
kanthi rasa kangen sing mamring
apa ta sing direngga rasa...?

 

nalika goreh nawani branange panggresah
marikelu ngirat rantase panjangka
sepa ririh nganyut jiwa
prasasat tan eling dina

 

ahh...
ngangeni latu
satemah dadi candu
kanggo ngundang impen-impen sing keburu
ninggalake wektu

 

(Banjur ana ngendi bakal daklari cicire impen, sauntara ilat lan lathi ketungkul ngeja aksarane kasepen).

 

kotabumi, 11 november 2014
DS

TETEPA DADI IMPENKU

pira-pira lawase
aku lan kowe
ngambah dalan kang seje

 

paran Kakang
sepi gebyare lintang
suwung poyang-payingan

 

tetepa dadi impenku, Kang
engga tumekane kapan
bakal bali maneh kaya sedya kala, lan
dadi esem kanggoku ing dalem lumaku
ana dalan iki

 

tetepa dadi impenku, Kang.

 

Kotabumi, 10 November 2014
DS

MUNG WEWAYANGAN

aku wis kesel mung dadi wewayanganmu, Kang
nyatane kabeh mung impen semu
ngulandara lan muspra
cinandhet rasa kang nyangking tatu

aku wis kesel mung dadi wewayanganmu, Kang
yen katresnan jinja lan cidra
nyatane lelakonku dudu lelakonmu
becik nyawijia mring lakon enggal, lan
mungkura saka pangangenku

eling mring kapangmu
kuwi dudu kapangku
eling mring tresnaku
kuwi dudu katresnanku meneh

pancen aku dudu banowati
kowe dudu janaka
pijer iki impen kang kudu kasimpen
lakonmu dudu lakonku
lan aku wus bosen nyidra impen

aku isih kelingan
marang sekabehing pangeman
rikala tukar rasa
liru kangen
ing pucuking lambe

lambemu
lambeku
wus
kobong

ahh..sapa sing ngerti....?

(ing ndhuwur wit trembesi garing, urip lan nasib nangis bareng guling-guling).

Kotabumi, 4 nov, 2014
DS

K A N Y A T A N

daktemu tetes atise bun ing netramu
isih padha kaya deksemana
nalika perih keket rinengkuh ana dhadha

kanyatan wus lumaku adoh, Yayi
wus lumaku adoh
kekejera kaya ngapa
sengara kae wus selot cetha

mara dakruket anggamu
bebarengan nyawang birune kanyatan
satengahe rasa kapang kang tan bisa uwal
satengahe seseg remugane ambegan
sarimbit ngeja aksarane pepisahan

Kotabumi, 25, agustus 2014
TS

KONANG KANGGO WENGIMU

Yayi, wengi iki aku ora bisa ngirim padhange rembulan
kaya sing saben-saben dakjanjekake
ing tawang sepi wengi-wengimu
jalaran impen-impen nyulaki tawang
jugar ketrajang lungite udan

dadia tirakatmu, Yayi
yen wengi iki aku mung bisa ngirim kumrelipe konang
lan sagatra cakepane tembang
ing kono kababar werdining pepadhang
yen ta sejatine peteng iku wis ora meneh dadi pepalang

kotabumi, 21 agustus 2014
dening  : Tejo Siswoyo
kanggo : Dyah Sekartadji

CRITA WENGI

langit wus laburan peteng
godhong-godhong padha anteng
kesaput pedhut ampak-ampak katrem
satengahe hawa adhem
amem-amem

ahh, wengiku
sawangen iki
kangenku mbrebes mili
kapisah dening gandhulane ati

ing endi anget alembanane lintangmu, Yayi
sumurupa yen sepi wis suwe njuwing ati
banjur kapan rembulan bakal bali leladhan
ing birune tawang
katresnan

Kotabumi, 31 juli 2014
DS

N G L A N G U T

nganti seprene
jebul aku ora kuwawa
kanggo nyirnakake rasa sih tresnaku marang sliramu
marang tetalian batin, sing satemene luput yen terus dirumati

pancen jroning ati iki isih kaliput kangen kang nebet
nanging rasa kangen kang ora beda kaya tembung kapang
sing kaucapake gegodhongan marang angin
sawuse kembang-kembange padha gogrog
prapta ing bumi

kanyatan wus lumaku adoh, Kang
kanyatan wus lumaku adoh.

kotabumi, 25 juli 2014
DS

OHH IMPENKU

lemah-lemah cengkar bera lan nglungka
kelangan bun-bun kang biasane gumuyu rena
temah kembang wis ora bisa meneh ngrembaka
kepangan mangsa

ohh, impenku tatu biru
nglinthing katuding wektu
ing kangenmu guritku rempu

Kotabumi, Lingsir sore
DS

SEKARING ATI

ilang ana ngendi jembar padhange tawang pasuryamu, Yayi
taman aku nandur ewoning lintang-lintang
ing antaraning lungit sorot angeting sesotya
lan endah ngujiwate esem pangalembana

ilang ana ngendi resik beninge tawang pasuryamu, Yayi
papan aku nglarung sakehing reridhu
papan aku necep sari manising madu
tresnamu

iba sepane nalika kabeh lunga
sabab ing tawang pasuryamu
ing esem ngujiwatmu
nate dakgadhangke rasa sih tresnaku

Kotabumi, 09 juli 2014
DS

S E P I

aku isih ing kene, kang
antaraning pangangening tawang kita
sangisore damar gantung lan tarupala
jroning omah joglo gapuk pereng arjuna

yen sliramu pengin ngerti ana rasa apa
garinge kaya pangeluse angin ketiga
kang ngelak tumuruhe bun-bun tresna
netes bantala

yen sliramu takon ana swasana apa
sepine ora nganggo ukara mbok menawa
kaya lintang-lintang wengi
kaya konang-konang sepi
dhewekan...!!!

Ing tepis wiringe kasunyatan
DS

CRITA SORE

ing kene aku lan kowe
nate diampirake angin sore
bawa rasa ngonceki cangkrimane gegodhongan
sadurunge ilang gogrok dadi larahan

ing kene aku lan kowe
nate bareng lungguh sesandhingan
sarimbit nggambar wewangunane pertamanan
kalane sore lingsir manjing ing pesamunan

lan nganti seprene
aku lan kowe isih ngambah dalan kang seje
nadyan wus maewu-ewu crita sore karonce
isih durung bisa kababar kapan tancep kayone

Kotabumi, 05 juli 2014
DS

WERDINING SEPI

yen kumrelipe konang ing tegalmu, Yayi
ora bisa meneh gawe padhange wengi
apa isih ana pengarep-arep kanggo
ngrantu tekane rembulan ndhadhari

saupama kembang wis kadung gogrog
katerak rosane angin wengi
saora-orane isih ana lintang siwi
kang bisa gawe padhange ati

mara sanjaa ing dhadhaku
bebarengan nyawang lumakuning angin
mbokmenawa saka kono kita bisa ngerti
yen dudu mung peteng kang bisa gawe tatune ati

Kotabumi, 04 juli 2014
DS

ING LELAMUNAN

yen keketeg
nyendhal jejantung
gegawangan lakuning angen
pindha ublik melip-melip
sajak wegah aweh padhange urip

adoh daksawatke panyawangku
ing antaraning lamure pangarep-arep
sing kethawilan ngranggeh pange impen
lan nggayuh geyonganing kayun
kang sangsaya adoh
tebane

srengenge wus sumendhe tawang, kang
srengenge wus sumendhe tawang
pindha atiku keplatrang, kebimbang
ing lelamunan

kotabumi, 3 juli 2014
DS

GURIT PITAKON

dakranggeh pucuk metelunge pangarep-arep
saderma takon : apa isih ana crita seje ing kene
kanggo dina tembe

dakturuti kridhaning ati saktlemik
saderma takon : apa isih ana pangarepan ing kene
marang udan wayah sore

ahh, kekasihku
apa isih ana critane langit biru
apa isih ana rob ilining madu
sauntara ati iki wis tatu biru
rinegem ing eri mangu

Kotabumi, lingsir sore
DS

GURIT SAUPAMA

saupama biyen aku wis kok tepangake karo rembulan, Kang
mesthine wengi iki aku ora andum crita karo lintang
sing wis kesel colok pepadhang
marang birune tawang

saupama biyen aku wis kok tepangake karo konang, Kang
mesthine wengi iki bisa dakselehake sepine ati marang jogan
lan nitipake dina-dina tembe marang
lakune warayang

wengi iki isih dawa
impen iki uga isih merdika
sepi iki saya karasa sepa

apa ora ana sing luwih wigati
saliyane sepi lan sepi
ing pawewehmu wengi...?

Kotabumi, 24 juni 2014
DS

C U T H E L

dakungkuri pereng wektu mawa panggresah
kareben ta gurit-gurit gumlasah sebah
nyatane sumiliring angin ora kuwawa
nitir gegadhangan kebak panjangka

dakungkuri pereng napas kebak kapang
nyatane ati iki mung keplatrang, kebimbang
kaya dene ngoyok rembulan kerahinan
ing pucuke tawang

kanyatan wus lumaku adoh, kang
kanyatan wus lumaku adoh
nyatane sumiliring angin mung kuwawa
nggambar patemon sing ginaris ing lembar nostalgia

apa isih ana sing saguh cawis klasa gelaran
papan mirunggan kanggo ngrembug biruning tawang
kang setya nyimpen sewu pepadhang
nglaras ngrangine langgam panguripan...?

kotabumi, 29 mei 2014
DS

R E M B U L A N

kang
rembulan kae apa ya isih duweku
awit saikine wis ora nate katon ing tawang biru
apa pancen wis kepangan kala rahu...?

kang
rembulan kae apa ya isih duweku
awit sing kasawang mung nggembulenge mega peteng
ameng-ameng

ahh, wengiku
apa sing dek wingi ilang bakal bali kumledhang
apa sing wingi kaliwatan bakal bali ing kiwa tengene dalan
sauntara grimis wis kawiwitan dadi udan
apa bakal bisa oncat nebusi pepadhang

yen rembulan mengko wengi ndadari, kang
aku lila sewengi muput ana kene
ora maelu adheme pedhut lan
apa wae kang memalang laku
uga umpamane sesuk kuwi mujudake dina kang pungkasan
aku lila
ngubur sekabehing pitakon
marang wektu

kotabumi, 22 mei 2014
DS

NEGARA KERE II

ingendi dununge katentreman
awit kahanan wis ora nyawisake papan
kanggo pisambat lan
ngutahake pangrasane rakyat
sabab kabeh panguwasa
padha rumangsa wis dadi malaekat
 
hee,,panguwasa....!!!
galo sawangen
matamu rak ya weruh ta
bengawane padha asat
iwake megap-megap
padha ngelak gorokane

ya gene kowe kok mung pamer esem rupa kucem
kok gendhong, kok indhit
jebul isine mung genthong-genthong mlompong
lan mblegendhuke weteng kadut isi wisa sarta
jerohan rempela atine kawula
sing kok kaniaya

sadawaning dalan sing ana mung pipihan gombal ora pakra
kanggo sumpel kupinge jaran lan
kacamata ireng jebul ora tembus panyawang...!!!

SIKAT... !!! GASAK... !!!
SRUDUK...!!! MAJUUU...!!!
ASU...!!!!
 
Kotabumi, 10 mei 2014
DS

NEGARA KERE

apa negara iki wis kere tenan ta, paman
awit aku weruh playune uwong oyak-oyakan
ngoyok rembulan kerahinan

apa negara iki wis kere tenan ta, bibi
awit kayu-kayu sengkleh dibabati
kaspe-kaspe tanpa aji
gaplek-gaplek dipepeni
pawone wis ora bisa ngukus ambune dangdangan pari
lan angete kopi wis ilang tanpa lari

banjur sapa...?
sapa sing arep gugat marang isen-isening jagad
sing pijer royokan brekat
tan keguh kidung pangruwat

kotabumi, madya ratri
DS

GURIT IKI

gurit iki
pangudarasaku marang wengi
sing kebacut anggone nguja sepi

gurit iki
pangundhamanaku marang angen
kang pijer nggetuni tangan
sing durung gaduk ngrentengi lintang
ngranggeh rembulan
papan jujugane tangan kamulyan

gurit iki
tuwuh ing antarane gebyaring lintang pengarep-arep
sawise tetaunan kandheg ana rasa lan lelamunan

Gejayan, 2005
DS

J A N J I

janji kang kinucap
lir duwure gunung
lan luase samodra kang biru
sliramu marang aku

lathimu dadi sirep
nilep panyawang netra
kagawa janji kang mijil
kelem ing kasunyatan

rina tumeka
wengi gumanti
dawa ngalela
ora beda

Jebul kabeh janji, amung ngimpi

kotabumi, 04 mei 2014
DS

S E P A

kepengin rasane bisa mumbul ana ing tawang
kekitrang
sinentor angin sungsang
ngluwar sakehing rerenggan
kumleyang tanpa sanggan

bisa ngrangeh kumrelipe lintang
bisa nggrayang eseme rembulan
sing biyen nate aweh pepadhang
ing kalane kapang

eman sing kasisa mung kari remukane ambegan
sing nyoba ngunjal sakehing panandhang
lan sengklehe pang-pang gegayuhan
kang rutuh katendhang
lungite warayang

Kotabumi, 2 mei 2014
DS

MADU BRANGTA

ing pangrengkuhing astamu, Kang
getih lan keteging jejantung iki
alon mbaka sekon nitir
ing satengahing samodra asihmu
banjur padha lelumban
ngenyut ilining madu brangta
karob-korub
ing memanis
necep sariraning kaendahan
trisna

Kotabumi, 18 maret 2014
DS

GURIT SEPI

ahh, kekasihku
ati iki isih gumlethak 
kebak tatu biru erem
njintel mili saka marasmu 
esem manis lan ganda arum 
ngebaki pasepen 
seksining sapada geguritanku
sing kacicir saka esemu

kotabumi, madya ratri
DS

ELEGI SORE

ati mosik
golak-galik 
kebrongot mramong sepa
latu panalangsa
ngobong langit werna jingga
pangimpenku ilang kasilep ing
walik angslupe surya

Kotabumi, Lingsir sore
DS

GURIT TUWA

kumleyang rasa mecaki sore
kagawa obah mosiking ati
nalika crita ing lathimu
bali kumledhang jroning kalbu

pancen ana rasa perih
saben nyawang tumpukan gurit tuwa
sing nate dak nggo nyathet umure candhikala
sadurunge gogrok kasilep ing waliking mega

mbaka siji
daktata esemu sing wingi
dadi crita esem wayah wengi
eseme rembulan kang lagi ndadari.

kotabumi, 13 februari 2014
DS